«Qoja Ahmet Yasaui» ordeni Áziret sultannyń ulaǵaty men taǵylymyn dáripteıtin marapat — Toqaev
ASTANA. KAZINFORM — Táýelsizdik saraıynda Túrkııa Prezıdenti Rejep Taııp Erdoǵandy «Qoja Ahmet Yasaui» ordenimen marapattaý rásimi ótti.
Memleket basshysy Qasym-Jomart Toqaevtyń aıtýynsha, Rejep Taııp Erdoǵan jahandyq saıasatta ádildik pen jaýapkershilik qaǵıdatyn tabandy túrde qorǵap júrgen asa kórnekti qaıratker. Sonymen qatar Túrkııa Prezıdenti túrki jáne ıslam órkenıetiniń yntymaqtastyǵyn nyǵaıtý isinde aıryqsha ról atqarady.
— Men ulystyń uly kúninde kıeli Túrkistanǵa arnaıy baryp, Áziret sultan rýhyna quran baǵyshtadym. Sol saparymda memlekettik nagradalarǵa «Qoja Ahmet Yasaui» ordenin engizý týraly mańyzdy bastama kóterdim. Bul marapatty Qazaqstannyń damýyna aıryqsha eńbek sińirgen elimizdiń jáne sheteldiń belgili ǵalymdaryna, memleket jáne qoǵam qaıratkerlerine tabystaý qajettigi jóninde aıttym. Soǵan sáıkes tıisti zań qabyldandy. Arnaıy jarlyqqa qol qoıdym. Bul - shyn máninde bedeli bılik, baǵasy joǵary marapat. Biz bul ordendi ázirlegende jasyl túske basymdyq berdik. Asyl dinimizdi osy tústiń orny erekshe. Al onyń quramyndaǵy kúmis - tazalyqtyń nyshany. Biz sózben bul - Áziret sultannyń ulaǵaty men taǵylymyn dáripteıtin marapat, — dedi Qasym-Jomart Toqaev.
Memleket basshysy bul ordenmen Túrkııa Prezıdentin marapattaý týraly sheshim qabyldaǵanyn basa aıtty.
— Siz bul ordenniń tuńǵysh ıegeri bolasyz. Munyń sımvoldyq máni óte zor. Bul marapat - uly babamyz salǵan rýhanı baýyrlastyq pen tarıhı ádildik jolynyń jarqyn kórinisi, — dedi Prezıdent.
Buǵan deıin Memleket basshysy Qasym-Jomart Toqaev elimizge memlekettik saparmen kelgen Túrkııa Prezıdenti Rejep Taııp Erdoǵandy Táýelsizdik saraıynda resmı qarsy alǵan edi.
