Qnet jáne ózge de pıramıdalar: 40 mln teńge shyǵyn, 9 adam sottaldy

ASTANA. KAZINFORM — Sońǵy úsh jylda Aqmola oblysynda qarjy pıramıdalaryn qurý jáne basqarý faktilerine baılanysty 10 qylmystyq is tirkelgen («Charoit», «Qnet», «Asar baspana», «Chai Tai», «S-Group», «Laım Akademııa», «ChiaTai Tianging», «Buyers Union»). 

Oblystyń 9 turǵynyna qatysty ártúrli qylmystyq jaza taǵaıyndaldy.

— Kókshetaý qalasynda «Qnet» qarjy pıramıdasyn uıymdastyrǵany úshin 26 jastaǵy A.Kırgabakova jáne 24 jastaǵy Qasymhan 5 jylǵa bas bostandyqtarynan aıyryldy.

Kırgabakova «Instagram» paraqshasyn belsendi túrde júrgizip, jańa qatysýshylardy tartý maqsatynda sán-saltanatty ómir saltyn saıahat, qymbat kólikter men qomaqty tabysyn kórsetken.

Uıymdastyrýshylar jelilik marketıng shemalaryn qoldanyp, óz qyzmetin Malaızııalyq kompanııa arqyly jasyryp, azamattardy «QVI tripsaver» atty jalǵan týrıstik kartalar men zergerlik buıymdardy satyp alýǵa shaqyryp, joǵary tabys ýáde etken. Mindetti shart — jańa qatysýshylardy tartý bolǵan, sebebi salymshylarǵa tólem tek jańadan tartylǵan azamattardyń qarajaty esebinen jasalǵan, — delingen Aqmola oblysynyń prokýratýrasy habarlamasynda.

Saldarynan, sottalǵandar 39 adamdy qarjy pıramıdasyna tartqan, keltirilgen shyǵyn 40 mln teńge.

Aıta ketelik Harmony Rider Technology qarjy pıramıdasy aqtóbelikterden 197 mln teńge jymqyrǵan edi.