«Qnet» qarjy pıramıdasyn uıymdastyrǵan 5 adamnan qymbat kólik, birneshe páter tárkilendi

QYZYLORDA. KAZINFORM – Qyzylordada «Qnet» qarjy pıramıdasynyń qurylymdyq bólimshesin uıymdastyrý isi boıynsha sot úkimi shyqty.

Qyzylorda oblysy boıynsha Ekonomıkalyq tergep-tekserý departamentiniń málimetine súıensek, kúdiktiler azamattardy kópdeńgeıli marketıngtik jeli men elektrondy kommertsııaǵa ınvestıtsııa salýǵa, onyń ishinde jalǵan «QVI tripsaver» saıahat kartalaryn jáne zergerlik buıymdardy satyp alýǵa úgittegen.

Qylmystyq is boıynsha tergeýdi qarjy monıtorıng agenttiginiń Qyzylorda oblysy boıynsha departamenti júrgizdi.

– Qatysýshylardyń salymy 840 myńnan 4 mln teńgege deıin aýytqyp, mindetti shart retinde basqa qatysýshylardy tartý talap etilgen. Nátıjesinde qarjy pıramıdasyna 51 adam qatysyp, olar 63 mıllıon teńgeden astam qarajat salǵan. Sot sheshimimen pıramıda jumysyn uıymdastyrǵan 5 adam kináli dep tanylyp, olarǵa 6 jyldan 7 jylǵa deıin bas bostandyǵynan aıyrý jazasy taǵaıyndaldy, – delingen habarlamada.

Sonymen qatar olardan quny 301 mln teńge bolatyn Astana qalasyndaǵy 7 páter jáne «Toyota Camry» avtokóligi tárkilendi.

Eske salaıyq, Qyzylorda oblysy boıynsha ekonomıkalyq tergep-tekserý departamenti 2019-2022 jyldary Qyzylorda qalasy men Qyzylorda oblysynyń aýmaǵynda «Qnet» qarjy pıramıdasyn qurý jáne basqarý faktisi boıynsha 1990 jyly týǵan Qazaqstan azamaty Almas Jubanaevqa izdeý jarııalaǵan bolatyn.