QJ Lıga: Bıyl qazaq fýtbolshylary madrıdtik «Atletıkomen» kezdesedi

ASTANA.KAZINFIRM — Fýtboldan Qazaqstan jasóspirimder lıgasy (QJ League) týrnıriniń aldaǵy maýsymynda 54 óńirde jasaqtalǵan 18 komanda baq synaıdy. 

QJ Лига: Биыл қазақ футболшылары мадридтік «Атлетикомен» кездеседі
Фото: QJ лига баспасөз қызыметі

Olardyń qatarynda, fýtboldan 16 jasqa deıingi Qazaqstan ulttyq quramasy da bar. Sondaı-aq, bıyl alǵash ret fýtboldan qyzdar lıgasynyń tusaýy kesiledi. Bul týraly lıganyń jańa maýsymyna arnalǵan baspasóz máslıhatynda habarlandy.

Astanada ótken baspasóz jıynynda týrnırdiń eki jyldyq jumysy qorytyndylandy. Osy ýaqyt aralyǵynda 226 jasóspirim fýtbolshy joǵary lıgalar men halyqaralyq matchtarǵa joldama alǵan. Olardyń qatarynda QJ lıgada jarqyrap kózge túsken «Qaırat» akademııasynyń túlegi, búginde londondyq «Chelsıge» aýysqan Dastan Sátpaev bar.

QJ lıga prezıdenti Rohýs Shoh bıylǵy maýsymnyń basty erekshelikterine toqtala otyryp, fýtbol jankúıerlerine qýanyshty jańalyqty jetkizdi. Bıyl lıganyń úzdik oıynshylarynan quralǵan komanda álemge áıgili fýtbol akademııasy — madrıdtik «Atletıkonyń» jas oıynshylarymen kezdesedi. Atalǵan match 23 tamyz kúni Almatyda ótedi.

QJ lıga
Foto: QJ lıga baspasóz qyzymeti

Belgili kásipker ári fılantrop, lıganyń Qamqorshylar keńesiniń tóraǵasy Tımýr Týrlov «Atletıkonyń» jaıdan-jaı tańdalmaǵanyn aıtyp ótti. 

«Biz tek myqtylarmen básekelesý arqyly óz qarqynymyzdy arttyra alamyz. Jyl saıyn lıga ókilderi Eýropadaǵy jaqsy degen fýtbol akademııalarymen kezdesip júr. Mine, bıyl áıgili „Atletıkonyń“ tárbıelenýshileri keledi. Biz álem úzdikterinen qoryqpaýymyz kerek. Kerisinshe, kil myqtylarmen ıyq tiresý arqyly óz sheberligimizdi arttyramyz. Jazda ótetin matchta bizdiń jas oıynshylardan kúter úmitim mol», — deıdi Týrlov.

Aıta keterligi, QJ lıga týrnıriniń 2025 jylǵy maýsymynda alǵash ret qyzdar lıgasy bastalady. Ázirge, 8 komandadan quralǵan 17 jasqa deıingi qyzdar ózara myqtyny anyqtaıdy.

Sonymen qatar, bıyl jasóspirimder lıgasyna 3 komanda qosyldy. Olar — fýtboldan 16 jasqa deıingi Qazaqstan quramasy, «Jeńis» jáne «Han Táńiri».

Lıganyń úshinshi maýsymy 19 sáýirge josparlanǵan.

Osyǵan deıin habarlaǵanymyzdaı, Fýtzaldan Qazaqstannyń 19 jasqa deıingi jastar quramasy 2025 jylǵy Eýropa chempıonatynyń irikteý kezeńin jeńispen aıaqtady.

Сейчас читают