Qgate júıesi shekaradan ótý ýaqytyn bir jarym mınýtqa deıin qysqartty

ASTANA. KAZINFORM – Memleket basshysy Qasym-Jomart Toqaevtyń shekaralyq ınfraqurylymdy jańǵyrtý jónindegi tapsyrmasyn oryndaý sheńberinde Qyrǵyzstanmen shekarada ornalasqan «Qordaı» ótkizý pýnktinde Qgate avtomattandyrylǵan tólqujattyq qadaǵalaý júıesi pılottyq rejımde engizildi. 

Bul azamattarǵa qujattaryn skanerleý arqyly protsedýradan óz betinshe ótýge múmkindik berip, bir adamnyń shekaradan ótý ýaqytyn 1,5 mınýtqa deıin qysqartyp otyr.

«Búgingi tańda tólqujattyq qadaǵalaýdyń osy júıesi arqyly táýligine 6-8 myń aralyǵynda adam ótkizemiz», - deıdi «Qordaı» shekaralyq qadaǵalaý bólimi bastyǵynyń orynbasary Qýat Kenjebaev.

Jalpy alǵanda «Qordaı» ótkizý pýnktin jańǵyrtý onyń ótkizý qabiletin arttyrýǵa múmkindik berdi.

«Qazirgi ýaqytta "Qordaı" ótkizý pýnkti arqyly 20 myńnan 30 myńǵa deıin adam, 3 myńnan 4 myńǵa deıin kólik quraldary ótedi. Ortasha alǵanda, júk tıelgen bir kólikti tekserýge 15-20 mınýt, bir jeńil avtomobıl úshin 5 mınýtqa deıin ýaqyt ketedi. Al memlekettik shekaradan ótip bara jatqan adamdardyń qujattaryn tekserý 3 mınýttaı ýaqyt alady», - dep atap ótti Qýat Kenjebaev.

Aıta keteıik, Oljas Bektenov Qyrǵyzstanmen shekaradaǵy ótkizý pýnktterin jańǵyrtý barysymen tanysty.