QazVac vaktsınasynyń qaýipsizdigi men tıimdiligi týraly esep ázirlenedi
QR Bilim jáne ǵylym vıtse-mınıstri Mıras Dáýlenovtyń aıtýynsha, qazirgi ýaqytta vaktsınany zertteý Densaýlyq saqtaý mınıstrligi bekitken hattamaǵa sáıkes shtattyq rejımde júrip jatyr.
«Almaty jáne Taraz qalalarynda tıisti GCP sertıfıkattary bar klınıkalarda zertteý júrip jatyr. Barlyq eriktiler apta saıyn dárigerlerge densaýlyǵynyń jaı-kúıi týraly habarlaıdy, klınıkalarǵa únemi kelip turady, olardy dárigerler baqylaıdy jáne eriktilerden vırýsqa tán antıdenelerge de, beıtaraptandyratyn antıdenelerge de synama alynady», - dedi vıtse-mınıstr Ortalyq kommýnıkatsııalar qyzmetinde ótken baspasóz máslıhatynda.
Spıkerdiń aıtýynsha, bıologııalyq qaýipsizdik problemalary ǵylymı-zertteý ınstıtýty vaktsınanyń qaýipsizdigi týraly esep daıyndady.
«Esep Densaýlyq saqtaý mınıstrligine beriledi jáne vaktsınanyń tıimdiligi týraly da esep ázirlenedi. Munda biz eriktilerdi klınıkalyq bazalarymyzǵa shaqyramyz, olardan synamalar alamyz jáne osy synamalardy óńdeý nátıjeleri boıynsha tıimdilikke baılanysty túpkilikti derekter kórinetin bolady», - dep túsindirdi M.Dáýlenov.
Buǵan deıin spıker eriktilerdiń klınıkalyq zertteýi qalaı ótip jatqanyn aıtyp bergen edi.
Sonymen birge, Bıologııalyq qaýipsizdik máseleleri ǵylymı-zertteý ınstıtýty janýarlarǵa arnalǵan koronavırýsqa qarsy vaktsına ázirleýdi josparlap otyr.
