QazVac daıyndyǵyn kim tekseredi

NUR-SULTAN. QazAqparat – QR Densaýlyq saqtaý birinshi vıtse-mınıstri Marat Shoranov qazaqstandyq QazVac vaktsınasynyń daıyndyǵyn tekserýmen qandaı mekeme aınalysatyndyǵyn aıtty, dep habarlaıdy QazAqparat tilshisi.

«Bul jumyspen eń aldymen atalǵan vaktsınany ázirleýshi ınstıtýt aınalysady. Al Densaýlyq saqtaý mınıstrligi tarapynan bul jumysqa Ulttyq dárilik zattardy saraptaý ortalyǵynyń sarapshylary men mamandary qatysady», - dedi Marat Shoranov Ortalyq kommýnıkatsııalar qyzmetindegi baspasóz máslıhaty barysynda.

Onyń atap ótýinshe, vaktsınany qoldanysqa engizý klınıkalyq synaqtar nátıjesiniń daıyn bolýyna baılanysty.

«Osy aptanyń ishinde qazaqstandyq vaktsınanyń klınıkalyq synaǵynyń úshinshi satysy 50 paıyzǵa aıaqtalady dep josparlanǵan. Tirkeý jáne odan ary paıdalanýǵa qatysty esepterdi kútetin bolamyz», - dedi QR Densaýlyq saqtaý birinshi vıtse-mınıstri.

Buǵan deıin Marat Shoranov Qazaqstandyq QazVac vatsınasyn qutyǵa quıý protsesi nelikten Túrkııada júrgiziletindigin túsindirgenin jazǵan edik.