QazTrade pen Astana HQO otandyq eksportty birlesip ilgeriletpekshi
Bul týraly QR Saýda jáne ıntegratsııa mınıstri Baqyt Sultanov Facebook -tegi paraqshasynda jazdy.
«Osy aptada bizdiń eksportty ilgeriletý baǵytynda jumys isteıtin operatorymyz – QazTrade kompanııasy Astana halyqaralyq qarjy ortalyǵymen memorandýmǵa qol qoıdy. Endi eksporttyq baǵyt boıynsha birlesip jumys isteıtin bolamyz», - dep jazdy mınıstr.
Onyń aıtýyna qaraǵanda, eki mekemeniń mamandary syrtqy naryq salasynda bilim almasyp, otandyó taýardy ilgeriletý múmkindikterin biriktirmekshi.
«Biz elektrondy saýda, bırjalyq saýda, naryqqa shyǵý sııaqty salalardaǵy quzyrettilikterimizdi biriktiremiz. Mysaly, QazTrade Fintech Hub Acceleration Program rezıdentterin halyqaralyq saýda alańdaryna shyǵarýǵa kómektesse, Astana halyqaralyq qarjy ortalyǵy taýar bırjalarynyń jumysy, taýarlardy jetkizý tizbekteri týraly málimetterdi jınaýǵa kómektesedi», - dep jazady vedomstvo basshysy.
Sondaı-aq, ol Memleket basshysy 2025 jylǵa qaraı Qazaqstannyń shıkizattyq emes eksportyn eki esege arttyryp, kólemin 41 mlrd dollarǵa jetkizý týraly mindet qoıǵanyn eske salady.
«Biz bul iste iri bızneske ǵana emes, shaǵyn jáne orta bızneske de basa nazar aýdaratynymyzdy naqtylaǵym keledi. Qazir syrtqy naryqtarǵa shyqqysy keletin shaǵyn óndirister kóbeıip keledi. Mysaly, et ónimderin óndirýshi kompanııa alǵash ret birden birneshe baǵyt boıynsha, olar: Ortalyq Azııa, Iran, Parsy shyǵanaǵy, Qytaıǵa shyǵýdy josparlap otyr.
Eksporttyq áleýetine senip otyrǵan bal, kıim, gıgıena quraldary, sómke óndirýshileri bar. Munyń bári «orta bıznes» sanatyna jatatyn kásiporyndar. Bizdiń mindetimiz – solarǵa kómektesý. Jaqynda eksporttyq «Akseleratsııa-2021» baǵdarlamasyna ótinimder qabyldaý aıaqtaldy. Onyń aıasynda 350 kompanııanyń ishinen 100 kásiporyndy irikteý josparlanýda. Іrikteý nátıdesin qyrkúıektiń ekinshi jartysynda aıta alamyn», - deıdi Baqyt Sultanov.
Mınıstrdiń aıtýnysha, elimizde eksporttaýshylardy memlekettik qoldaýdyń 20-dan astam quraly jumys isteıdi. Jyl saıyn olardyń kólemi, baǵyttary men sapasy bıznestiń qajettilikterine jáne naryqtardaǵy aǵymdaǵy jaǵdaıǵa sáıkes jetilip kele jatyr.
«QazTrade-tiń Astana halyqaralyq qarjy ortalyǵymen yntymaqtastyǵy eksportqa baǵdarlanǵan óndiristerge ınvestıtsııalar tartýǵa septigin tıgizedi. Men shetelde ınvestorlarmen kezdesken kezde kóbi Astana halyqaralyq qarjy ortalyǵy quqyǵy boıynsha jumys isteý múmkindigine qyzyǵýshylyq tanytyp jatady. Keıbir bıznes ókilderi Qazaqstandy óz taýaryn Qytaıǵa nemese Reseıge eksporttaıtyn qaqpa retinde qarastyrady jáne sol úshin jóndiris oshaǵyn ornatqysy keledi. Onyń ishinde «Qorǵas», shekara mańyndaǵy ındýstrııalyq saýda-logıstıkalyq habtarǵa qyzyǵýshylyǵy joǵary», - dep jazady Saýda jáne ıntegratsııa mınıstri.
