«QazTrade» AQ 12 óńirmen erte shyǵatyn kókónisterdi jetkizýge shart jasasty
ASTANA. KAZINFORM - Saýda jáne ıntegratsııa birinshi vıtse-mınıstri Aıjan Bıjanovanyń tóraǵalyǵymen ótken keńeste ishki naryqty maýsymaralyq kezeńde qajetti jemis-jıdek, kókónis ónimderimen qamtamasyz etý máseleleri talqylandy.
Esterińizge sala keteıik, QR Premer-mınıstri Oljas Bektenov maýsymaralyq kezeńde kókónister baǵasynyń aýytqýyn boldyrmaý úshin Ózbekstan men Tájikstannan tasymaldaýshylarmen tikeleı kelisimshart jasaý máselelerin pysyqtaýdy tapsyrǵan bolatyn.
Búgingi tańda «QazTrade» AQ 12 óńirmen 4 myń tonnaǵa jýyq erte shyǵatyn kókónisterdi jetkizýge shart jasasty.
«QazTrade» AQ tarapynan barlyq qajetti jumystar júrgizildi. Biz Ózbekstan Respýblıkasynyń «UZTRADE» AQ - men jáne Tájikstan Respýblıkasynyń Úkimeti janyndaǵy Memlekettik jáne materıaldyq rezervter jónindegi agenttikpen jáne «Tájagropromeksport» memlekettik ýnıtarlyq kásipornymen kókónisterdi jetkizýge sharttar jasastyq», - dep habarlady «QazTrade» AQ Bas dırektorynyń birinshi orynbasary Nurlan Qulbatyrov.
Ol sondaı-aq qazir kókónis ónimderiniń logıstıkasy men qunyna qatysty máseleler pysyqtalyp jatqanyn atap ótti.
Óz kezeginde birinshi vıtse-mınıstr Aıjan Bıjanova keı óńirler erte shyǵatyn kókónisterdi satyp alýǵa asyqpaı otyrǵanyn aıtty.
«Baǵany turaqtandyrý úshin óńirlerge erte shyǵatyn kókónisterdi satyp alý mindetteldi. Osyǵan baılanysty ákimdikter ýaqtyly kelisimsharttar jasasyp, ónimniń úzdiksiz jetkizilýin qamtamasyz etýi qajet», - dep qorytyndylady Aıjan Bıjanova.
