QazSovid-in: 8 eriktiniń ǵana aǵzasynda antıdene tolyq qalyptaspaǵan
NUR-SULTAN. QazAqparat –Qazaqstandyq vaktsına salǵyzǵan 200-den astam eriktiniń segiziniń aǵzasynda antıdene tolyq qalyptaspaǵan, dep habarlaıdy QazAqparat.
Ortalyq kommýnıkatsııalar qyzmetinde ótken baspasóz máslıhatynda BAQ ókilderi otandyq vaktsınanyń klınıkalyq synaǵyna qatysqan eriktiler týraly suraq qoıdy. «Synaqqa qatysqan 202 eriktiniń ishinde 8 adamnyń aǵzasynda qalaısha antıdene oıanbaǵan? Ony qalaı bildińizder», - degen saýalǵa Bıologııalyq qaýipsizdik problemalary ǵylymı-zertteý ınstıtýtynyń bas dırektory Kúnsulý Zakarıa jaýap berdi.
«Immýnogramma arqyly antıdeneniń qabiletin kórýge bolady. Immýnıtet anyqtalǵan joq degen sózdiń ózi durys emes. Immýnıtet bar, biraq tómen, biz belgilegen deńgeıge jetpegen. Bul –tabıǵı aǵzanyń tabıǵı úderisi. Negizinen olar jasy 40-tan asqan adamdar bolatyn», - dedi Kunsulý Zakarııa.
Ǵalym atalǵan eriktilerdiń vırýs juqtyrmaǵanyn da atap ótti.
«Olar aýyrǵan joq. Aǵzalarynda antıdene tolyq qalyptaspasa da, tómen shoǵyry paıda boldy. Eriktiler arasynda vırýs juqtyrǵandar joq. Immýndyq jaýap kóptegen faktorlarǵa, adam denesiniń sol kezdegi kúıine, sozylmaly aýrýlarǵa baılanysty. Osy sııaqty faktorlardy esepke almasaq, eriktilerdiń aǵzasynda vaktsınalardyń jekelegen túrleri ımmýnıtet qalyptastyra alady. Ol úshin aǵzanyń ımmýndyq deńgeıin kóterý kerek» - dedi maman.
