QazNews24 satıralyq pablıginiń avtoryna 5 jyl bas bostandyǵyn shekteý úkimi kesildi

ALMATY. KAZINFORM – QazNews24 satıralyq pablıginiń avtory Temirlan Eńsebek bes jylǵa bas bostandyǵyn shekteý úkimi shyqty. Bul týraly Almaty qalasynyń Naýryzbaı aýdandyq soty málim etti. 

— Sot pablık ákimshisin kináli dep tanydy. Almaty qalasynyń Naýryzbaı aýdandyq sotynda áleýmettik jeli arqyly ulttyq arazdyqty qozdyrdy dep aıyptalǵan Temirlan Eńsebekke qatysty qylmystyq is qaraldy, — dep habarlady sottan.

Aıyptalýyshynyń Instagram paraqshasynda 34 myńnan astam oqyrmany bar. Ol basqa ult ókilderiniń ulttyq abyroıy men qadir-qasıetin kópshilik aldynda qorlaýǵa baǵyttalǵan, dóreki, balaǵat sózdermen jazylǵan mátini bar mýzykalyq kompozıtsııamen birge post jarııalaǵan. Sot pablık avtorynyń mundaı áreketterin Qazaqstan Respýblıkasynyń negizgi qaǵıdattarynyń biri bolyp tabylatyn ultaralyq kelisim men halyq birligin buzýǵa baǵyttalǵan kontent dep tanyǵan.

— Sottalýshynyń kinási is materıaldarymen, sonyń ishinde sot-psıhologııalyq jáne fılologııalyq saraptama qorytyndysymen, jaýap alý hattamalarymen jáne zattaı dáleldemelermen dáleldendi, — delingen habarlamada. 

Naýryzbaı aýdandyq sotynyń málimetinshe, aıyptalýshy Temirlan Eńsebek óz kinásin moıyndamaǵan. 

— Sot otyrysynyń qorytyndysy boıynsha, qylmystyq is materıaldaryn zerttep, taraptardyń sot jaryssózderinde aıtqan ustanymdaryn eskere otyryp, sot sottalýshyny atalǵan áreketti jasaǵany úshin kináli dep tanydy, — dep habarlady sottan.

Sot sheshimimen, aıyptalýshy belgili bir qyzmetpen aınalysý quqyǵynan aıyryla otyryp, 5 jylǵa bas bostandyǵynan shekteldi. 

Sot úkimi zańdy kúshine engen joq.

Eske sala keteıik, buǵan deıin áleýmettik jelide terrorızmdi nasıhattaǵan Abaı oblysynyń turǵyny ustalǵanyn jazǵan bolatynbyz.