QAZMEDFEST 2026 — respýblıkalyq festıvaline myńnan astam jas qazaqstandyq qatysty
ASTANA. KAZINFORM — 2026 jylǵy 6-10 sáýir aralyǵynda Qazaqstanda QAZMEDFEST respýblıkalyq festıvali ótti. Іs-shara QR Mádenıet jáne aqparat mınıstrliginiń qoldaýymen «Medıtsına jastary» respýblıkalyq qoǵamdyq birlestigi tarapynan uıymdastyryldy.
Festıval jastar arasynda volonterlik qozǵalysty damytýǵa, salaýatty ómir saltyn nasıhattaýǵa jáne áleýmettik bastamalardy qoldaýǵa baǵyttaldy.
— Festıval elimizdiń alty qalasyn qamtydy: Astana, Almaty, Shymkent, Semeı, Aqtóbe jáne Qaraǵandy. Barlyǵy 13 áleýmettik mańyzy bar is-shara uıymdastyrylyp, oǵan 1 myńnan astam qazaqstandyq jas qatysty. Atap aıtqanda, Almatyda Dúnıejúzilik densaýlyq kúnine oraı salaýatty ómir saltyn nasıhattaýǵa arnalǵan marafon ótti, Shymkentte donorlyq aktsııa aıasynda 50 stýdent qan tapsyrdy, al Semeıde volonterler oblystyq hospıske baryp, medıtsınalyq jáne qaıyrymdylyq kómek kórsetti, — delingen habarlamada.
Sonymen qatar festıval aıasynda mektep oqýshylaryna arnalǵan kásiptik baǵdar berý is-sharalary uıymdastyryldy. Qatysýshylar medıtsınalyq mamandyqtarmen jáne beıindi joǵary oqý oryndarynyń bilim berý múmkindikterimen tanysty.
QAZMEDFEST — 2026 jastardyń áleýmettik belsendiligin arttyrýǵa jáne volonterlik qozǵalysty damytýǵa yqpal etken mańyzdy alańǵa aınaldy.
Festıvaldiń qorytyndysy retinde «Taza Qazaqstan» ekologııalyq aktsııasy aıasynda jalpyulttyq senbilik ótkizý josparlanǵan. Ol elimizdiń barlyq óńirinde ótedi.
Osyǵan deıin qan donorlaryna aqshalaı ótemaqy kólemi ulǵaıtyla ma degen saýalǵa jaýap alǵan edik.
