QazExpoCongress ulttyq kompanııasy enshiles korporatıvtik qorlarynyń birin taratty
ASTANA. KAZINFORM - Joǵary aýdıtorlyq palatanyń nusqaýy boıynsha «QazExpoCongress» Ulttyq kompanııasy» AQ (ári qaraı – Ulttyq kompanııa) qurylymyn ońtaılandyryp, «Qazaqstan» Saýda-kórme ortalyǵy» enshiles korporatıvtik qoryn taratty.
Caýda jáne ıntegratsııa mınıstrligi men onyń vedomstvolyq baǵynysty uıymdarynda júrgizilgen memlekettik aýdıt nátıjesi boıynsha Ulttyq kompanııanyń eki korporatıvtik qory bar ekeni anyqtaldy: «QazExpoCongress» KQ jáne «Qazaqstan» Saýda-kórme ortalyǵy» KQ. Birinshi qor arqyly Ulttyq kompanııany nysanaly qarjylandyrý júzege asyrylady, al ekinshisi Máskeýdegi Halyq sharýashylyǵy jetistikteri kórmesi aýmaǵyndaǵy jáne Dýbaıdaǵy EKSPO-2020 aýmaǵyndaǵy qazaqstandyq pavılondardy basqarady.
Bul eki kommertsııalyq emes uıymdaǵy jumys júktemesiniń azdyǵy, sondaı-aq jekelegen fýnktsııalardyń qaıtalanýy olardyń odan ári qatar jumys isteýiniń oryndylyǵyna qatysty suraq týyndatty. Osyǵan baılanysty saýda jáne ıntegratsııa mınıstrligine «QazExpoCongress» UK» AQ-men birlesip tıisti shara qabyldaý tapsyryldy.
Nátıjesinde Ulttyq kompanııa Mınıstrlikpen kelisim boıynsha «QazExpoCongress» KQ-nyń qaramaǵyna qolda bar múlikti, ǵımarattardy, sondaı-aq sharttar boıynsha mindettemelerdi bere otyryp, «Qazaqstan» Saýda-kórme ortalyǵy» KQ-ny taratý týraly sheshim qabyldady.
- Júrgizilgen memlekettik aýdıt qorytyndysy boıynsha Joǵary aýdıtorlyq palatanyń nusqamasynyń basqa tarmaqtary tolyq oryndalǵanǵa deıin baqylaýda bolady, - delingen habarlamada.
Osyǵan deıin medıtsınalyq saqtandyrý júıesine memlekettik aýdıt júrgizilgeni týraly habarlandy.