«QazCopyright» avtorlyq quqyqty basqarýdyń jańa tsıfrlyq platformasy iske qosylady
ASTANA. KAZINFORM — Ádilet mınıstrligi men «Ulttyq zııatkerlik menshik ınstıtýty» ázirlegen «QazCopyright» jobasy avtorlyq jáne sabaqtas quqyqtardy basqarýǵa arnalǵan biryńǵaı tsıfrlyq platforma retinde iske qosylady. Bul týraly QR Ádilet vıtse-mınıstri Bekbolat Moldabekov Ortalyq kommýnıkatsııalar qyzmetinde ótken baspasóz konferentsııasynda habarlady.
— «QazCopyright» platformasy shyǵarmalar men avtorlardy, quqyq ıelenýshilerdi biryńǵaı tizilimge biriktirip, sharttardy avtomattandyryp, syıaqyny bólý júıesin engizedi. Negizgi paıdalanýshylar qatarynda avtorlar men quqyq ıelenýshiler, ujymdyq basqarý uıymdary, sondaı-aq tele-radıo kompanııalar, teatrlar, kınoteatrlar, strımıngtik qyzmetter jáne kafe-meıramhanalar bar, — dedi Bekbolat Moldabekov.
Onyń sózinshe, joba aıasynda avtorızatsııa elektrondyq tsıfrlyq qoltańba (ETsQ), eGov nemese SMS arqyly júzege asady. Sonymen qatar ISRC/ISWC halyqaralyq kodtary bar biryńǵaı reestr qurylyp, tarıfter men bıllıng avtomattandyrylatyn bolady. Platformada kelisim-shart túrleri ıkemdi, onlaın eseptilik pen API-ıntegratsııalar qarastyrylǵan.
— Platformany engizý úsh kezeńde júzege asyrylady. 2025–2026 jyldary teleradıo kompanııalar, alǵashqy avtorlar men ujymdyq basqarý uıymdary qosylady. 2026 jyldyń shildesine deıin teatrlar, kınoteatrlar, strımıng qyzmetteri, galereıalar, kabel operatorlary engiziledi. Al 2026 jyldyń shildesinen bastap kafe, meıramhana, dúken, kólik jáne basqa jappaı paıdalanýshylar qosylady, — dep túıindedi vıtse-mınıstr.
Sonymen qatar Ádilet mınıstrligi azamattardy jalǵan sot oryndaýshylardan saqtandyratynyn jazǵanbyz.