Qazavtojol: Nur-Sultannan Şýchınskige deıin 750-den astam avtokólik jetkizildi
NUR-SULTAN. QazAqparat - Nur-Sultannan Şýchınskige deıin 750-den astam avtokólik jetkizildi, dep habarlaıdy «Qazavtojol» UK« AQ baspasóz qyzmeti.
«Jol paıdalaný ýchaskeleriniń, polıtsııa men tótenshe jaǵdaı qyzmetkerleri 2 qańtar kúni saǵat 11:30-da Şýchınskige qaraı avtokólikter kolonnasyn jetkizdi. Ol ýaqytta tólem qabyldaý pýnktinde 400-ge jýyq jeńil kólik jınalǵan. Olardyń aǵyny túski úshke deıin azaımaı, orta eseppen 2-3 saǵat ishinde ýchaske boıynsha 2000-ǵa jýyq kólik júrip ótken» delingen habarlamada.
Málimetke saı, shydamsyzdyq tanytqan keıbir júrgizýshiler eskertýlerge qulaq aspaı, tólem qabyldaý pýnktin balamaly joldar arqyly aılanyp ótpek bolǵan. Kólikter kolonnasyna kómek kórsetýge kelgen polıtsııa qyzmetkerleriniń qaýipsiz jyldamdyqty, qajetti ara qashyqtyqty saqtaý týraly eskertýleri de elenbedi. Bir qatarmen qozǵalǵan kolonnany basyp ozbaq bolǵan júrgizýshiler bir emes, birneshe jol kólik apatyna sebepshi boldy. Bir baǵytta 2, al keri baǵytta 3 jol apaty bolyp, jalpy esepte 15 kólik soqtyǵysqan. Jaraqat alǵandar joq.
Al Şýchınsk-Nur-Sultan baǵytynda 400-ge jýyq kólik jetkizildi.
Aýa-raıynyń qolaısyz jaǵdaılaryna baılanysty 9 ýchaskede barlyq avtokólikterdiń qozǵalysyna ýaqytsha shekteý qoıyldy.
Saǵat 18:00-den bastap Nur-Sultan-Şýchınsk ýchaskesi eki baǵytta da jabyq. Respýblıkalyq mańyzy bar avtojoldarda táýlik boıy 616 tehnıka jumys jasaýda. «Qazavtojol» UK« AQ júrgizýshilerge jol erejesin saqtaý, ruqsat etilgen jyldamdyqty asyrmaý, qaýipsiz qashyqtyqty saqtaý qajettiligi týraly eskertedi.
Sonymen qatar, saparǵa tek qysqy dóńgelektermen shyǵýǵa keńes beredi.
