«Qazaqstan» ulttyq arnasy jańa maýsymda kórermenge ne usynady
ASTANA. QazAqparat - 28 tamyzda «Qazaqstan» teleradıokorporatsııasyna qarasty barlyq medıaaktıvter tyń formatta jumystaryn bastaıdy. Resmı belgisi «Qazaqstan» bolyp ózgergen ulttyq arna men oǵan enshiles aqparat quraldaryn jańa maýsymda aýqymdy ózgerister kútip tur. Osy rette «QazAqparat» HAA tilshisi oqyrman qaýymdy respýblıkanyń barlyq aımaqtaryna tarap, memlekettik tildiń mereıin asyratyn ulttyq arnanyń jańa maýsymdaǵy tynysymen tanystyrady.
Jańa maýsymda Qazaqstan Ulttyq arnasynda túrli baǵyttaǵy ondaǵan joba kórermenge jol tartady. Atap aıtsaq, «Jibek joly juldyzy», «Men qazaqpyn» halyqaralyq mýzykalyq megajobalary, ulttyq estradany nasıhattaıtyn - «Hit Qazaqstan» mýzykalyq án-sherýi jańa maýsymda efırge enedi.
Oǵan qosa qoǵamdyq, ıntellektýaldyq baǵyttaǵy baǵdarlamalardyń sany artady. Búgingi zamannyń suranysyna saı keletin realıtı - shoý janryndaǵy baǵdarlamalar kórsetiledi. Kásipkerlikti nasıhattaıtyn - «Úmitker», tabıǵattyń tylsym kúshi men qudiretin kórsetetin - «24 saǵat tabıǵat qushaǵynda» ekshn realıtı-shoýy, otbasylyq qundylyqtardy dáripteıtin - «Ene men kelin» qatarly baǵdarlamalar el nazaryna usynylmaq.
Sonymen qatar efırden birqatar derekti fılmder toptamasy kórsetiledi: Qazaqstannyń kópshilikke beımálim tarıhy týraly áńgimeleıtin - «Kıeli Qazaqstan», sondaı elimizdiń áıgili adamdary jaıly syr shertetin «Uly dala ulaǵaty». Sonymen qatar, rebrendıng aıasynda burynǵy baǵdarlamalardyń formattary ózgeredi.
Qazirgi tańda elimizde sheteldik teleserıaldardan góri otandyq ónimderge qyzyǵýshylyq artyp otyr. Osy baǵytta sońǵy bes jyl otandyq serıaldardy túsirý jumystary bastalyp, zor tájirıbe jınaqtalǵan. Álbette, serıal túsirý jumysynda kósh bastaǵan ulttyq arnanyń jańa maýsymda ázirlegen týyndylary kóp. «Qazaqstan» ulttyq arnasy otandyq teleserıaldardy damytý maqsatynda 2009 jyldan osy ýaqytqa deıin alýan taqyrypty qamtıtyn 77 telehıkaıa túsirgen. Jańa maýsymda arna óz kórermenderine «Ómir dastan» tarıhı dramasyn, «Іńkár júrek» telehıkaıasynyń ekinshi maýsymyn, «Eki júz», «Ana qadiri», «Týǵan jer», «Jańa qonys» hıkaıasynyń ekinshi maýsymyn, «Qozy Kórpesh - Baıan sulý», «Saǵan senemin» týyndylaryn dúıim jurttyń nazaryna usynady,. Bul týyndylardyń qaı-qaısysy da kórermenderdiń suranysyna ıe. Ótkenge úńilip, búgingi kúnniń bolmysynan syr shertetin, el tarıhy men ult múddesi jolynda zor qyzmet atqaryp, bolashaqqa baǵyt beretin telehıkaıalar kóshi áli de jalǵasyn taba bermek.
Eske sala ketsek, 23 tamyzda QR Aqparat jáne kommýnıkatsııalar mınıstri Dáýren Abaev pen «Qazaqstan» RTRK tóraǵasy Erlan Qarın teleradıokorporatsııanyń barlyq medıaaktıvterinde jańa maýsymnyń tusaýkeserin ótkizgen bolatyn. 28 tamyzda resmı belgisi «Qazaqstan» bolyp ózgeretin ulttyq arnada jańa maýsym bastalady. Osy turǵyda onyń quramyna enetin arnalar men radıolarda aýqymdy ózgerister bolyp, rebrendıng júrgizildi, stýdııalar jańartylyp, jańa baǵdarlamalar efırge qosylady.
Rebrendıng barysynda «Qazaqstan» korporatsııasynyń medıaaktıvterine ortaq, tanymal logotıp bekitilip, reneımıng, redızaın jumystary júrgizilgen. Jańa logotıp - korporatsııanyń quramyndaǵy arnalar men radıostantsııalardyń birtutastyǵyn bildiretin arnaıy belgi retinde - Qazaqstan Respýblıkasynyń Memlekettik týy ispetti jasalǵan. Jalpy jańa logotıp - korporatsııanyń tehnologııalyq damýǵa umtylysyn, úlken medıaotbasy resýrstarynyń sabaqtastyǵyn bildiredi.
28 tamyzdan bastap «Qazaqstan» Ulttyq arnasy - «Alma TV», «ID TV» sııaqty eldegi iri kabeldik operatorlar arqyly HD formatta habar tarata bastaıdy.
