«Qazaqstan» UA-nyń eki baǵdarlamasy nelikten «megajoba» ataldy
ASTANA.QazAqparat - «Qazaqstan» RTRK» AQ-nyń basqarma tóraǵasy Erlan Qarın «Men Qazaqpyn» jáne «Jibek Joly Juldyzy» atty eki baǵdarlamalardyń nelikten «megajoba» dep atalatynyn túsindirip berdi, dep habarlaıdy «QazAqparat» HAA tilshisi.
«Men Qazaqpyn» jáne «Jibek Joly Juldyzy» jobalary bir ýaqytta oılastyrylǵan. Biraq «Men Qazaqpyn» jobasynda biz eń aldymen qazaqtyń ulttyq ánderine, kúıi men termelerine basa mańyz beremiz. Demek, ol baǵdarlamada biz qazaqtyń dástúrli mádenıetin kórsetip jatyrmyz. Ár túrli kanaldardy qurý arqyly baı mádenıetterimizdi baılanystyra bilýimiz kerek. Tek qana Qazaqstannyń ishi men shektelip qana qalmaı, baıqaý barysynda Qytaıdan, Mońǵolııa men Reseıden de ónerpazdardy tarttyq. Al «Jibek Joly Juldyzynyń» saıysy, álbette aýqymdyraq. Joǵaryda atap ótkenimdeı, ol saıysqa 9 eldiń ánshileri qatysady. Ol joba zamanaýı ánderdi oryndaýǵa baǵyttalǵan. Sol sebepti, eki jobada Qazaqstannyń aýqymymen ǵana shektelip qalmaǵandyqtan, atalǵan eki baǵdarlama «megajoba» dep esepteledi», - deıdi Erlan Qarın.
Onyń aıtýynsha, atalǵan jobalardy kóktemdegi oılastyrý kezeńinde «Qazaqstan» ulttyq arnasynyń ujymy eldiń ishimen birge, kórshi elderdiń aýdıtorııasyn tartýdy maqsat tutqan. Demek, ujym sheteldik telekórermender qyzyǵyp kóretindeı «Qazaqstandyq ónimdi» shyǵarýdy kózdegen.
«Jobany «Jibek Joly Juldyzy» dep nege atadyq? Sebebi, munda tek qana belgili bir eldermen shektelip qalýdy kózdep otyrǵan joqpyz. Máselen, «Eýrovıdenıe» desek, kóz aldymyzǵa tek qana Eýropa elderiniń ánshileri qatysatyn saıys elesteıdi. «Túrkvıjondy» da solaı oılaımyz. Al biz Uly Jibek jolynyń boıynda ornalasqandyqtan, atalǵan ataýdy mýzykalyq ónerde aýqymdy túrde qoldanyp kórýdi jón dep sheshtik. Sondyqtan jobanyń ataýy óte durys tańdaldy degen oıdamyn», - dedi Erlan Qarın.
Atalǵan jobaǵa Germanııa men Qytaıdan da qyzyǵýshylyq tanytqan eken. Alaıda uıymdastyrýshylar alǵashqy saıysta 9 elmen shektelýdi jón dep tapqan.
