«Qazaqstan» telearnasynda Ózbekstandaǵy Qazaqstan jylynyń ashylý saltanaty kórsetiledi
NUR-SULTAN. QazAqparat - Búgin «Qazaqstan» telearnasynda Ózbekstandaǵy Qazaqstan jylynyń saltanatty ashylý rásimi kórsetiledi. Bul týraly Instagramdaǵy jeke paraqshasynda Qazaqstan Prezıdenti Qasym-Jomart Toqaev jazdy, dep habarlaıdy QazAqparat.
«Búgin saǵat 20:50-de «Qazaqstan» ulttyq telearnasy Ózbekstandaǵy Qazaqstan jylynyń saltanatty ashylý rásimin kórsetedi. Gala-kontsertke Qazaqstannyń tanymal óner ıeleri men saxna sheberleri D. Qudaıbergen, Á.Dinishev, A.Musaqojaeva, M.Muhamedqyzy, M.Mýdrıak, M.Shotabaev, N.Bekmuhamedov jáne basqalar qatysty», - dep jazǵan Memleket basshysy kontsertten vıdeoúzindini jarııalady.
Eske salaıyq, keshe, 15 sáýir kúni Tashkentte Ózbekstandaǵy Qazaqstan jylynyń ashylý saltanaty ótti. Qazaqstandyq ártisterdiń gala-kontsertin eki memlekettiń basshylary Qasym-Jomart Toqaev pen Shavkat Mırzıeev tamashalady. Ózbekstan jurtshylyǵy asyǵa tosqan ártis - ánshi Dımash Qudaıbergen bolǵany sózsiz. Jankúıerler ony Tashkentte qushaq jaıa qarsy alǵanyn jazǵan bolatynbyz. Keıin Dımashtyń Ózbekstandaǵy fan-klýbynyń Instagram paraqshasynda onyń sahnada kórsetken óneriniń vıdeosy jarııalandy.
