«QAZAQSTAN» telearnasynda Naýryz meıramyna arnalǵan beınebaıannyń tusaýy kesildi
Ulystyń uly kúnine oraı arnaıy jazylǵan «Beý, Naýryz!» ániniń avtory - Syrym Nábıqulov, sózin aqyn Erlan Júnis jazǵan. Rejısseri – Jansaıa Kópbaeva.
Beınebaıan Almaty oblysynyń kórikti jerleri men Іle ózeniniń boıynda, arnaıy turǵyzylǵan nysanda, «Kóshpendiler» fılminiń dekoratsııasynda túsirildi.
Týyndyny dástúrli ánshiler Ardaq Balajanova, Aıgúl Qosanova, Erlan Rysqalı jáne ótken jyly Ulttyq arna usynǵan «Qazaqstan daýysy» jobasynyń jeńimpazy Quralaı Meırambek oryndap shyqty. «Bastaý» toby dombyramen súıemeldep, beınebaıannyń negizgi keıipkerleri retinde arnanyń «Aqparat», «Apta», «Tańsholpan» baǵdarlamasynyń júrgizýshileri qatysty.
Beınebaıannyń negizgi ıdeıasy ǵasyrlar boıǵy kóshpeliler tarıhy men «Jańa Qazaqstannyń» ulttyq mádenıetin ushtastyrý, jańarý men jańǵyrýdyń kórinisin beıneleý. «Naýryz meıramynyń máni jańarý, jańa kún degendi bildirse, qazaq halqy dál qazir shynaıy jańarý men jańǵyrý kezeńin ótkerýde. Beınebaıanda ulys kúniniń mán-maǵynasyn ashýmen qosa, halqymyzdyń búgingi rýhanı belesin beıneleýdi, keler kúnge degen aıryqsha úmitin kórsetýdi maqsat ettik», - deıdi rejısser Jansaıa Kópbaeva.
Beınebaıannyń shyǵarmashylyq top quramyna kınooperator Erkinbek Pitirálıev, qoıýshy-sýretshi Nurbolat Japaqov, montaj rejısseri retinde Nurtas Mamytpaı shaqyryldy.
Ánniń sózi túrik jáne aǵylshyn tiline aýdarylyp, beınebaıan halyqaralyq aýdıtorııaǵa jol tartpaq.
