«Qazaqstan» telearnasynan «Saraı syry» telehıkaıasy efırge shyǵady

NUR-SULTAN. QazAqparat - Búgin QR Aqparat jáne qoǵamdyq damý mınıstrliginiń qoldaýymen «Qazaqstan» telearnasy túsirgen 12 bólimdi «Saraı syry» telehıkaıasy efırge shyǵady. Telehıkaıa 1823-1845 jyldary Bókeı Ordasynda bılik qurǵan tarıhı tulǵa Jáńgir hanǵa qatysty oqıǵalarǵa negizdelgen, dep habarlaıdy QazAqparat tilshisi.

Týyndyda Jáńgir hannyń tulǵasy XVIII ǵasyrdyń sońy men XIX ǵasyrdyń ortasynda Bókeı ordasynyń tarıhynda bolǵan oqıǵalar jelisi arqyly kórsetiledi. Saıası arenadaǵy rólimen birge, halyqty bilimge tartýǵa baǵyttalǵan bastamalary, qazaq dalasyna batys órkenıetiniń kelýine sebepker bolýy, bıleýshi saraıyndaǵy ishki ómiri telehıkaıanyń negizgi ıdeıasy retinde alyndy.

«Orynbor jáne Ýfa qalalary múftıiniń qyzy Fatıma hanshanyń Han ordasyna kelip túsýimen hıkaıadaǵy shytyrman oqıǵalar jańa ópic alady. Handyqtyń sońǵy jyldarynda Isataı men Mahambettiń tulǵasyna qatysty shıeleniske toly tarıhı oqıǵalar da qamtylǵan. Bul oqıǵalardyń kópshiligi tarıhı shyndyq bolǵanymen, telehıkaıada kórkem shyǵarmaǵa tán stılmen astasa beriledi», - deıdi joba jetekshisi Arman Sqabyluly.

Telehıkaıanyń qoıýshy-rejısseri – Baqyttas Sanıtas. Stsenarıı avtorlary – Jámıt Kósherbaev, Asqar Dúısenbi jáne Arman Sqabyluly. Telehıkaıanyń túsirilim jumystary Almaty oblysy men Almaty qalasynda ótti. Basty keıipker Jáńgir han rólin Medǵat Ómirálıev, Fatıma rólin Ámına Mektepbaeva, Qazıma rólin Zarına Karmen, Júzim rólin Ulbolsyn Shalqarova, Mahambet beınesin Darhan Súleımenov, Isataı rólin Nurlan Saǵynaev, Qalı sultan rólin Farabı Ábsamatov somdap shyqty. Jáńgir hannyń anasy Atan hansha beınesinde Tynyshkúl Sultanberdıeva oınady.

Akter Nurlan Saǵynaev kórermenge «Qazaqstan» telearnasy túsirgen «Abaı» tarıhı telehıkaıasyndaǵy Ospan beınesi arqyly tanys bolsa, Darhan Súleımenov «Orbulaq shaıqasy» telehıkaıasynda Qarasaı batyrdyń rólimen belgili.

«Saraı syry» tarıhı telehıkaıasy «Qazaqstan» telearnasynan búginnen bastap dúısenbi-juma aralyǵynda 21:30-da efırge shyǵady.