«Qazaqstan» telearnasynan kórermenderge «Úmitker» jańa realıtı-shoýy jol tartady
ASTANA. QazAqparat - Búgin, 24 qyrkúıekte «Qazaqstan» Ulttyq telearnasynan kórermenderge «Úmitker» jańa realıtı-shoýy jol tartady, dep habarlaıdy telearnanyń baspasóz qyzmeti.
Baǵdarlama júrgizýshisi - belgili qazaqstandyq kásipker Qýanysh Shonbaı. Atalmysh joba jastar arasynda qalyptasqan tamyr-tanyssyz jáne qoldaýsyz jeke, tabysty kásip ashý múmkin emes degen uǵymnyń qate ekenin jetkizedi.
Aıta ketsek, «Úmitker» - otandyq televızııadaǵy bıznes salasyna arnalǵan alǵashqy aýqymdy biregeı joba.
Osy jobaǵa qatysý úshin 10 myńnan astam úmitker ótinish bildirip, olardyń ishinen televızııalyq kastıngke tek 100 adam shaqyrtý aldy. Qatysýshylardyń aıtýynsha, bul - óz qabiletińdi synaý úshin úlken múmkindik. Sondaı-aq, joba jeńimpazy Qýanysh Shońbaıdyń kompanııalar jelisinen jalaqysy joǵary top-menedjerlik qyzmetke ıe bolyp qana qoımaı, 5 mıllıon teńge kóleminde syıaqy alatyn bolady.
Joba barysynda Qýanysh Shonbaı kásip ashý men damytý jolynda qandaı tásilder qoldaný kerektigin jáne jeke tájirıbesimen bólisetin bolady. Basty maqsat - bıznes áleminde jetistikke umtylǵan azamattardy yntalandyrý. Úmitkerlerdi bıznec salasyndaǵy kásibı mamandar, sarapshylar men keńesshiler baǵalaıtyn bolady.
Kórermenderge tek shoý emes, paıdaly aqparat usynatyn jańa joba búgin saǵat 18:05-te kórsetiledi.
