«QAZAQSTAN DAÝYSY» megajobasynyń jeńimpazy anyqtaldy

NUR-SULTAN. QazAqparat – Tórt aı boıy otandyq telearnalardaǵy senbilik baǵdarlamalar arasynda top jaryp, reıtıng boıynsha kósh bastaǵan áıgili «The Voice» shoýynyń qazaqstandyq nusqasy márege jaqyndady. Búgin 4 tálimger men 4 úmitker arasynan úzdigi anyqtaldy, dep habarlaıdy atalǵan telearnanyń baspasóz qyzmeti.

Sáken Maıǵazıevtiń shákirti Quralaı Meırambek «Qazaqstan daýysy» mýzykalyq jobasynyń jeńimpazy atanyp, 5 mıllıon teńge ıelendi. Sonymen birge «Qazaqstan» teleradıokorporatsııasy ári qaraı Quralaıdyń ónerine qoldaý bildiredi.

SMS-daýys berý nátıjesi boıynsha:

1-oryn – Quralaı Meırambek

2-oryn – Erik Tólenov

3-oryn – Ernar Amandyq

4-oryn – Arýjan Aıdarbek ıelendi

Bıyl jobaǵa qatysýǵa www.qazaqstan.tv resmı saıty men aımaqtaǵy irikteýler arqyly 6000-nan astam adam ótinim berip, buryn-sońdy bolmaǵan rekord ornatty. Olardyń arasynan alǵashqy kezeńge 200-ge jýyq qatysýshy shaqyrtý aldy. Elimizdiń túkpir-túkpirindegi talanttardyń basyn qosqan jobaǵa Ýkraına, Qyrǵyzstan, Grýzııa, Qytaı elderinen úmitkerler qatysty.

Buǵan deıin olar «Kórmeı tańdaý», «Jekpe-jek», «Jarǵa jyǵý», tikeleı efırdegi saıystar men «Jartylaı fınal» kezeńderinde baq synaǵan bolatyn. Tálimger Maıra Muhamedqyzynyń tobynan fınalǵa Ernar Amandyq, Sáken Maıǵazıevtiń tobynan Quralaı Meırambek, Marjan Arapbaevanyń tobynan Arýjan Aıdarbek, ALEM-niń tobynan Erik Tólenov joldama aldy.

Qatysýshylar tek vokaldyq qabiletterine qaraı tańdalatyn «The Voice» jobasy álemniń 140-tan astam elinde kórsetiledi. Áıgili teleshoýdyń qazaqstandyq nusqasy apta saıyn álemdik «Best of the Voice» reıtıngisine enip, joǵary kórsetkishke ıe boldy. Al qatysýshylardyń jobada oryndaǵan ánderi YouTube-taǵy resmı arnada 37 mıllıonnan astam qaralym jınady. https://www.youtube.com/c/thevoiceofkazakhstan