Qazaqstan Barysy–2026: Jantilek Nurtilepuly alǵash qatysqanynda-aq top jardy
ASTANA. KAZINFORM — Mańǵystaý oblysynyń ókili Jantilek Nurtilepuly («Labaq batyr») qazaq kúresinen elimizdiń basty dodasy — Qazaqstan Barysy — 2026 sýpertýrnıriniń jeńimpazy atanyp, alǵashqy qatysýynda-aq altyn belbeýdi jeńip aldy.
Jartylaı fınalda ol Qostanaı oblysynyń ókili, Qazaqstan Respýblıkasynyń sport sheberi Almas Jumaǵalıdy («Óteı») jeńip, sheshýshi beldesýge joldama aldy.
Fınalda debıýtant Jambyl oblysynyń ókili, qazaq kúresiniń tanymal balýandarynyń biri Ǵalymjan Qyryqbaımen («Barys») kezdesti. «Qazaqstan Barysy — 2023» týrnıriniń jeńimpazy atanǵan tájirıbeli qarsylasymen ótken tartysty beldesýde Jantilek Nurtilepuly jeńiske jetip, mansabynda alǵash ret Qazaqstan Barysy altyn belbeýiniń ıegeri atandy.
Aıta keteıik, Jantilek Nurtilepuly — Qazaqstan Barysy — 2026 týrnıriniń eń jas qatysýshylarynyń biri. Soǵan qaramastan, ol alǵashqy qatysýynda-aq altyn belbeýdi jeńip alyp, el balýandarynyń jańa býynynyń áleýetin aıqyn kórsetti.
Týrnırdiń qola júldesin Shymkent ókili, eresekter arasyndaǵy Qazaqstan Respýblıkasynyń chempıony Nursultan Qojageldiuly («Batyr») jeńip aldy. Úshinshi oryn úshin ótken beldesýde ol Qostanaı oblysynyń balýany Almas Jumaǵalıdan basym tústi.
Týrnır jeńimpazy Qazaqstan Barysy altyn belbeýimen qatar 15 mıllıon teńge kólemindegi aqshalaı syılyqqa ıe boldy. Kúmis júldegerge kúmis belbeý men 3,5 mıllıon teńge, al qola júldegerge qola belbeý jáne 1,5 mıllıon teńge tabystaldy.
Eske salaıyq, buǵan deıin Qazaqstan Barysy-2026 týrnıriniń shırek fınalısteri anyqtalǵanyn jazǵanbyz.
