Qazaqstan Barysy Grand Slam týrnıriniń alǵashqy júldegerleri marapattaldy
ASTANA. KAZINFORM – Astanada ótip jatqan dzıýdodan Qazaqstan Barysy Grand Slam 2026 halyqaralyq týrnırinde alǵashqy júldegerler anyqtaldy. Fınaldyq beldesýlerdi Týrızm jáne sport mınıstri Erbol Myrzabosynov tamashalap, áıelder arasyndaǵy 48 keli salmaq dárejesiniń jeńimpazdary men júldegerlerin marapattady.
Atalǵan salmaqta Nıderland sportshysy Amber Gersjes fınalda mońǵolııalyq Naransetseg Ganbaatar sportshysyn jeńip, altyn medaldi ıelendi. Qola júlde ıtalııalyq Francheska Mılanı men reseılik Krıstına Dýdına sportshylarǵa buıyrdy.
Aıta keteıik, 8–10 mamyr kúnderi aralyǵynda uıymdastyrylyp jatqan Qazaqstan Barysy Grand Slam týrnıri Qazaqstanda tórtinshi márte ótip jatyr. Baıraqty báseke Astanadaǵy Jaqsylyq Úshkempirov atyndaǵy jekpe-jek saraıy kesheninde uıymdastyrylǵan.
Mınıstrlik málimetinshe, bıylǵy dodaǵa álemniń 39 elinen 300-den astam sportshy qatysyp, tatamıde ózara myqtyny anyqtap jatyr. Týrnır barysynda Olımpıada chempıondary men júldegerleri, álem chempıondary, sondaı-aq álemdik reıtıng kóshbasshylary beldesip jatyr.
Qazaqstan Barysy Grand Slam týrnıri Halyqaralyq dzıýdo federatsııasynyń resmı kúntizbesine engen jáne Olımpıada oıyndaryna irikteý kezeńindegi mańyzdy reıtıngtik jarystardyń biri sanalady.
Halyqaralyq týrnır aldaǵy kúnderi de jalǵasyp, jankúıerlerge tartysty beldesýler syılamaq.
Astanada dzıýdodan Qazaqstan Barysy Grand Slam 2026 bastalǵanyn jazǵan edik.
Ázirge Qazaqstan qorjynyna eki júlde tústi. Sherzod Davlatov Astanadaǵy Grand Slam týrnıriniń qola júldesin ıelendi. Al Talǵat Orynbasar ekinshi jyl qatarynan Qazaqstan Barysy Grand Slam-nyń kúmis júldesin aldy.
