Qazaqstan Barysy Grand Slam: eki kúnniń qorytyndysy boıynsha Qazaqstan úzdik úshtikte tur

ASTANA. KAZINFORM - Astanada dzıýdodan ótip jatqan Qazaqstan Barysy Grand Slam týrnırinde Qazaqstan quramasy jalpykomandalyq esepte eki kúnniń qorytyndysy boıynsha úshinshi orynǵa jaıǵasty. 

Qazaqstan dzıýdo federatsııasynan málim etkenindeı, qazaqstandyqtar eki kúnde 1 altyn, 3 qola medal jeńip aldy. 

Týrnırdegi alǵashqy bestiktiń tizimi:

1. Italııa (1 altyn, 1 kúmis, 2 qola),

2. Horvatııa (1 altyn, 1 kúmis),

3. Qazaqstan (1 altyn, 3 qola),

4. Ózbekstan (1 altyn),

5. Portýgalııa (1altyn).

Búgin 81 kelige deıingi salmaqta qola júlde alǵan Abylaıhan Jubanazar jarystan soń áserimen bólisti.

«Búgin myqty babymda boldym dep aıta almaımyn, biraq bar kúshimdi saldym. Eń qıyn beldesýlerim japon balýany, tórt márte Grand Slam chempıony Fýdzıvara Sotaro jáne Olımpıada jeńimpazy Hasan Halmýrzaevpen boldy. Amalyn taýyp, jeńiske jettim. Tatamıge shyqqan kezdegi sezimdi sózben aıtyp jetkizý qıyn. Jankúıerlerimiz óte myqty qoldaý kórsetti. Dýshanbedegi Grand Slam týrnırinen keıin óz elimizdegi saıysta bir demmen kúresip shyqtym. Ár beldesý ońaı bolǵan joq», - dedi Abylaıhan Jubanazar.

Astana qalasyndaǵy Jaqsylyq Úshkempirov atyndaǵy jekpe-jek saraıynda ótip jatqan álemdik doda 12 mamyrda máresine jetedi. 

Eske sala keteıik, budan buryn Baqytjan Abdýrahmanovtyń Qazaqstan Barysy Grand Slam týrnıriniń qola júldesin jeńip alǵanyn jazǵan bolatynbyz. Sondaı-aq Qazaqstan qorjynyna taǵy bir qola medal tústi.