QAZAQSTAN arnasynyń dárishanasy ashyldy
ASTANA. QazAqparat - L.N.Gýmılev atyndaǵy Eýrazııa ulttyq ýnıversıtetiniń Jýrnalıstıka jáne saıasattaný fakýltetinde QAZAQSTAN arnasynyń dárishanasy ashyldy, dep habarlaıdy QazAqparat tilshisi.
Arnaıy dárishana Qazaq televızııasynyń 60 jyldyq mereıtoıy aıasynda uıymdastyrylyp otyr.
Onda tuńǵysh qazaq telearnasynyń tarıhy, qazaq televızııasyna eńbegi sińgen tulǵalar týraly mol derekter, oqýǵa qajetti kitaptar qoıylǵan jáne ınteraktıvti taqtamen jabdyqtalǵan.
«Ótken ǵasyrdyń ekinshi jartysynda adamzat tarıhyna jáne keleshegine áser etken úsh jańalyq boldy: ǵaryshty ıgerý, atomdy meńgerý jáne televızııa edi. Televızııanyń adam ómirindegi, qoǵamdaǵy ornynyń qanshalyqty ekenin baǵamdaı berińizder. Óz ákem Semeı teleradıo komıtetin basqardy. Sondyqtan, televızııa salasy men úshin ystyq. Barshańyzdy saltanatty meerkemen quttyqtaımyn. Jańa dárishana keleshekte jaqsy mamandardy tárbıeleýge óz úlesin qosady dep senemin», - dedi EUÝ rektory, doktor, professor Erlan Sydyqov Qazaq televızııasynyń 60 jyldyǵyna arnalǵan saltanatty keshte.
Resmı shara EUÝ Jýrnalıstıka jáne saıasattaný fakýlteti stýdentteriniń kontserttik baǵdarlamasyna ulasty.
Eske sala keteıik, 1958 jyly 8 naýryzda elimizde alǵash ret Almatyda tikeleı telehabar taratylǵan bolatyn. Ár jyldary Qazaq televızııasy san túrli qurylymdyq ózgeristerge ushyrady. 1960-1970 jyldary shyǵarmashylyq birlestikter «Shuǵyla», «Qurdastar» baǵdarlamalaryn ashyp, osy kezeńde basshylyqta bolǵan K.Shalabaev, K.Úsebaev, H.Hasenov, K.Smaıylovtar Qazaqstandaǵy televızııanyń jan-jaqty damýyna zor úles qosty. Kógildir ekranda kóp serııaly telespektaklder («Qymyzhana»), derekti telefılmder (50 serııa), avtorlyq baǵdarlama («Suhbat»), ulttyq boıaýy qanyq jastarǵa, balalarǵa arnalǵan habarlar («Altybaqan», «Aıgólek»), aýyl sharýashylyǵyn («Aq bıdaı»), óndiris taqyrybyn qozǵaıtyn («Operatsııa «Rıtm») t.b. týyndylar jaryqqa shyǵyp jatty.
Elimiz egemendik alǵannan soń Qazaqstan Teleradıokorporatsııasyna Ǵadilbek Shalahmetov, Sherhan Murtaza, Áshirbek Kópishev, Erlan Satybaldıev, Esetjan Qosýbaev, Ǵalym Dosken, Nurtileý Imanǵalıev, Dáýren Ábdihamıtov, Janaı Omarov, Nurjan Muhamedjanova syndy basshylar jetekshilik etti. Qazirgi ýaqytta Erlan Qarınniń basshylyǵyndaǵy teleradıokorporatsııa tyń ıdeıalarmen jumysty jalǵastyrýda. 2011 jyldyń 1 qyrkúıeginen bastap, Elbasy N.Á.Nazarbaevtyń tapsyrmasymen Ulttyq arna 100 paıyz qazaq tilinde habar taratýǵa kóshti.
