«Qazaqstan» arnasyndaǵy «Jibek joly juldyzy» jobasy: Qyrǵyzstandyq alda keledi
ASTANA. QazAqparat - «Qazaqstan» ulttyq arnasynda qazaqstandyq biregeı joba - «Silk Way Star» án baıqaýy ótýde. Búgin telejobaǵa qatysýshylar ónerlerin sońǵy ret kórsetti, dep habarlaıdy QazAqparat.
Bul joly tóreshiler baıqaý qatysýshylaryna qandaı upaı berilgendigin jarııa etken joq. Ol kelesi senbide ótetin gala-kontsertte belgili bolyp, baıqaý jeńimpazynyń esimi atalady.
Al osy ýaqytqa deıin alǵan upaılary boıynsha qyrǵyzstandyq Omar 389 upaımen alda kele jatyr. Odan 379 upaı jınaǵan tatar ánshisi Malıka da qalysar emes. Úzdik úshtik qatarynda 368 upaı alǵan Aıqyn Tólepbergen de bar.
Qalǵan ánshilerdiń upaı sandary kelesideı: ázerbaıjandyq Efendı - 349, grýzııalyq Taımaz Adjaıa - 341, ózbekstandyq Saıda - 335, tájikstandyq Safarmýhamad - 288, túrkııalyq Fýlın - 243, bashqurtstandyq ıAn Lıra - 224.
Aıta keterligi, otandyq televıdenıede mundaı deńgeıdegi halyqaralyq mýzykalyq telejoba buryn-sońdy bolmaǵan.
