«Qazaqstan» arnasynda jańa halyqaralyq megajoba bastalady
ASTANA.QazAqparat - «Qazaqstan» Ulttyq arnasynda 30 qyrkúıekten bastap «Jibek Joly Juldyzy» halyqaralyq mýzykalyq saıysy kórermenge jol tartady, dep habarlaıdy «QazAqparat»HAA tilshisi.
Bul týraly OKQ-da ótken baspasóz máslıhatynda «Qazaqstan» RTRK» AQ-nyń basqarma tóraǵasy Erlan Qarın habarlady.
«Bul halyqaralyq deńgeıdegi mańyzdy joba. Jobanyń ataýyn «Jibek Joly Juldyzy» dep qoıǵanymyz sondyqtan. Osy ataý arqyly Jibek Joly boıyndaǵy memleketterdiń mádenıetin tanystyryp, elderdi bir-birine jaqyndastyrýdyń jolyn qarastyrmaqpyz», - . Bul jobanyń ereksheligi, birinshiden tutastaı, ıaǵnı ıdeıasynan bastap qurylymyna deıin ózimizdiń ónimimiz. Bul bizdiń arnanyń áriptesteriniń arnaıy uıymdastyrǵan jobasy, ıaǵnı sheteldik telearnalardan kóshirilgen franshıza emes. Ekinshiden, bul halyqaralyq deńgeıdegi úlken joba. Qazirge deıin 9 eldiń qatysýshylary óziniń daıyndyǵyn bildirip otyr. Qazirdiń ózinde bul jobanyń aýdıtorııasy 100 mln. adamdy qamtıdy», - deıdi Erlan Qarın..
Onyń aıtýynsha, UlyJibek Jolynyń boıynda ornalasqan Qazaqstan, Qyrǵyzstan, Tájikstan, Ózbekstan, Túrkııa, Ázerbaıjan, Grýzııa, Reseı Federatsııasynyń: Tatarstan, Bashqurstan sııaqty elderiniń jarqyn juldyzdary bir sahnada baq synasady. Joba zamanaýı mýzykalyq kontenttiń alýan túrliligi men aýqymynyń keńdigimen ǵana erekshelenbeıdi. Aldymen ol qatysýshy elderdiń erekshe dástúrleri men mádenıetteriniń baılanysýy arqyly búkil túrki tildi álemge ortaq medıaınfraqurylymnyń damýyna septigin tıgizedi. Sebebi, «Jibek Joly Juldyzy» megajobasynyń basty maqsaty Uly Jibek joly boıyndaǵy memleketterdiń qarym-qatynasyn biriktirý, jańa mýzykalyq dástúrdi ornatý.
«Jibek Joly Juldyzy» Ulttyq arnada birneshe aı boıyna aptasyna bir ret kórsetiletin bolady. Joba 12 kontsertten turady.
Televızııalyq shoý-joba qatysýshy elderdiń reıtıngi joǵary telearnalarynda da kórsetiledi.
