«Qazaqstan» arnasynda tikeleı efırdi kóbeıttik - Lázzat Tanysbaı
NUR-SULTAN. QazAqparat – Elordada «Qazaqstan» teleradıokorporatsııasy jobalarynyń jańa maýsymy tanystyryldy, dep habarlaıdy QazAqparat tilshisi.
«Qazaqstan» RTRK» AQ basqarma tóraǵasy Lázzat Tanysbaı ulttyq arnanyń 61-shi maýsymy ashylatynyn eske saldy jáne jańa jobalar jóninde baıandady.
«Eń aldymen tikeleı efırde kópshiliktiń qatysýymen, kórermenniń aralasýymen boıamasyz ótetin jobalardy kóbeıttik. Maqsat – talapshyl da synshyl aýdıtorııamyzdyń suranysyna jaýap berý. Mysaly, kún saıyn keshki saǵat 20:30-da qoǵamda qyzý talqyǵa túsken máselelerdi Ulttyq arnanyń tikeleı efırinde «Ashyq alañ»-nan kóre alasyzdar. «Ashyq alañ»-da qoǵam ókilderi men Úkimettiń túrli býyndaryndaǵy jaýapty tulǵalar kezdesip, máseleni ashyq talqylaıdy. Oǵan kórermenderimiz belsendi túrde atsalysýda. Bir efırde tek Whatsapp messendjeri arqyly 4 myńnan asa suraq túsip, bir saǵatta myńnan astam qońyraý shalyndy», - dedi L. Tanysbaı.
Sonymen birge, medıa menedjer retinde uıym basshysy «Niet» jobasynyń erekshe mańyzdy ekenin jetkizdi.
«Baıqasańyzdar, bizdiń qoǵamda kómekke muqtaj adam kóp, sonymen qosa, kómekteskisi keletinder de jetkilikti. Tek joldaryn bile bermeıdi. Mine, sondaı adamdardy biriktiretin «Niet» áleýmettik jobasyn ashýdaǵy maqsatymyz – sapaly televızııalyq shoý jasaý ǵana emes, kez kelgen qıyn jaǵdaıdan birlese shyǵýǵa múmkindik bar ekenin kórsetý. 9 qyrkúıekten bastap efırge jol tartqan jobanyń keshegi habarynda stýdııamyzda kópbalaly bir otbasy baspanaly boldy. Biz aqsha jınamaımyz, stýdııaǵa kelgen adamǵa baǵdarlamany kórip otyrǵan árbir qazaqstandyq kómek kórsete alady», - dedi spıker.
TNS Central Asia zertteý kompanııasynyń derekteri boıynsha, «Qazaqstan» ulttyq arnasynyń reıtıngtik kórsetkishteri kóktemmen salystyrǵanda 121 paıyzǵa ósken.
«Bul – búkil ujymnyń jaz boıǵy tynymsyz eńbeginiń nátıjesi. Qara shańyraqtaǵy sabaqtastyqty saqtaý - bizdiń paryzymyz. Bul maýsymda 14 jańa jobanyń tusaýyn kessek, kórermenniń joǵary baǵasyna ıe bolǵan 10 baǵdarlama jalǵasyn tabady. «Tañsholpan», «Dara jol», «Másele», «Parasat maidany» sııaqty baǵdarlamalardy da qaıta usynyp otyrmyz. Salamyzdyń basshysy mınıstr myrza aldymyzǵa úlken talap qoıyp otyr. Qazaqy rýhanı qundylyqtardy saqtaı otyryp, naryqtyq nátıjelerge, básekelestikke kóńil bólýimiz kerek», - dedi Lázzat Tanysbaı.
Aıta keteıik, kúzgi jańa maýsymda «Qazaqstan» Ulttyq arnasynan 14 jańa joba efırge shyǵady. Osyǵan deıin kórermen yqylasyna bólenip úlgergen 10 baǵdarlama jańasha formatta qaıta usynylady.
