Qazaqstan arnasy Sırııadan qaıtarylǵan qazaqstandyqtar týraly eksklıýzıvti kadrlardy kórsetedi
NUR-SULTAN. QazAqparat – «Qazaqstan» telearnasy Sırııadaǵy soǵystan qutqarylǵan qazaqstandyqtar týraly derekti fılm túsirdi, dep habarlaıdy QazAqparat «Qazaqstan» RTRK» AQ-nyń baspasóz qyzmetine silteme jasap.
«Jýsan: oralý men ońalý» atty eki bólimdi týyndy «Jýsan» arnaıy gýmanıtarlyq operatsııasynyń jelisimen ázirlengen.
«Fılmde qazaqstandyqtardyń qaqtyǵys aımaqtaryna qalaı attanǵany, qandaı qıyndyqtarǵa tap bolǵany, jesir qalǵandardyń jat jerde qalaı ómir súrgeni aıtylady. Derekti fılmde teris dinı aǵymdardyń yqpalymen shekara asqan qazaqstandyqtar óz oqıǵalaryn ashyq baıandaıdy jáne buǵan deıin esh jerde kórsetilmegen eksklıýzıvti kadrlar kórsetiledi. Sonymen qatar, elge oralǵannan keıingi radıkaldyq baǵyttan bas tartyp, beıbit ómirge qaıta beıimdelýi týraly áńgimeleıdi», - dedi telearnanyń baspasóz qyzmetinen.
Kartınada elimizdiń ortalyq jáne batys aımaqtarynan Sırııaǵa attanǵan qazaqstandyqtar týraly sırek kadrlar kórsetilip, qaqtyǵys aımaǵynda qaza tapqan qazaqstandyq otbasynyń oqıǵasy baıandalady. Túsirilimge belgili dintanýshylar men teolog mamandar, mınıstrlik ókilderi men quqyqqorǵaý salasynyń mamandary da qatysty.
Derekti fılm «Qazaqstan» arnasynyń efırinen 3 jáne 10 qarasha kúnderi saǵat 20:45-te kórsetiledi.
