QazaqGeography tarıhı-mádenı jáne tabıǵı murany saqtaýǵa baǵyttalǵan josparyn tanystyrdy

NUR-SULTAN. QazAqparat - QazaqGeography respýblıkalyq qoǵamdyq birlestigi tarıhı-mádenı jáne tabıǵı murany saqtaý ıdeıasyn odan ári damytýǵa arnalǵan jańa usynystaryn tanystyrdy, dep habarlaıdy QazAqparat.

Prezıdent Ákimshiligi Basshysynyń birinshi orynbasary Dáýren Abaevtyń tóraǵalyǵymen ótken medıakeńeste uıymdastyrýshylar birlestiktiń jańa josparyn nazarǵa usyndy. Bul josparda Birlestikti geografııa jáne soǵan sabaqtas – tabıǵatty qorǵaý, ekotýrızmdi damytý salalary boıynsha jetekshi saraptaý uıymyna aınaldyrý kózdelgen.

Medıakeńeske QR Aqparat jáne qoǵamdyq damý mınıstri Aıda Balaeva, «QazaqGeography» RQB Basqarma tóraǵasy Orman Nurbaev, respýblıkalyq BAQ basshylary qatysty.

«Qorshaǵan ortaǵa jáne rekreatsııalyq resýrstarǵa uqypty qaraý – Memleket basshysy saıasatynyń mańyzdy quramdas bólikteriniń biri. Osy turǵyda Qazaqstannyń tarıhı-mádenı murasyn, biregeı tabıǵı kapıtalyn saqtaý men damytýǵa baǵyttalǵan jańa ustanymdarǵa erekshe nazar aýdarý qajet. «QazaqGeography» biregeı ári tanymal brend retinde osy ózgeristerdi júzege asyrý isinde zor áleýetke ıe», – dep atap ótti Dáýren Abaev.

«QazaqGeography» maqsatynyń biri – qorshaǵan ortany qorǵaý, otandastarymyzǵa ata-babamyzdan qalǵan ult ıgiligi, baı murasyna erekshe qamqorlyq kórsetýdi dáripteý. «QazaqGeography» birlestiginiń jobalary qorshaǵan ortany saqtaýǵa, qoǵamda tarıh, geografııa, mádenıet, ólketaný, ekologııalyq týrızm salalary boıynsha aǵartý jumystaryn júrgizýge baǵyttalǵan.

«QazaqGeography» RQB Basqarma tóraǵasy Orman Nurbaev kezdesý barysynda: «Biz qazaqstandyqtardy QazaqGeography qaýymdastyǵynyń múshesi bolýǵa shaqyramyz. Kúsh-jigerimizdi biriktire otyryp, elimizdiń jańa tarıhı jáne tabıǵı destınatsııalaryn ashýǵa jáne qoldanystaǵylaryn keńinen tanýǵa, qoǵamnyń geografııalyq bilimin jetildirýge, ekologııany jaqsartýǵa yqpal ete alamyz», – dedi.

Medıakeńes aıasynda «QazaqGeography» RQB men respýblıkalyq BAQ basshylary yntymaqtastyq jónindegi memorandýmǵa qol qoıyldy.

QazaqGeography qyzmeti men birlestikke múshe bolý jaıly tolyǵyraq aqparatty qazaqgeography.kz saıtynan alýǵa bolady, sondaı-aq+7 (7172) 999-336 (ishki. 1014/1033), [phone] nómirlerine habarlasa alasyz.