QazaqGeography qoǵamynda bıyl 14 joba iske asyrylmaq
ASTANA. QazAqparat - Elimizde geografııalyq jáne ekologııalyq ǵylymdardy damytýǵa barynsha belsendi úles qosatyn ortanyń biri - ol Qazaqstandyq Ulttyq Geografııalyq Qoǵamy. Bunda elimizde oryn alatyn geografııalyq jáne ekologııalyq máselelerdi akademııalyq ortanyń qatysýymen sheshýdiń naqty joldaryn izdeý maqsatynda memlekettik jáne memlekettik emes uıymdar biriktirilgen.
Aıta ketý kerek, QazaqGeography kókeıtesti ǵalamdyq jáne memlekettik máselelerdi, onyń ishinde: elimizdiń turaqty damýynyń geografııalyq aspektileri men «jasyl» ekonomıkaǵa ótý, Qazaqstan Respýblıkasynyń zamanaýı geosaıasattaǵy jáne geokeńistiktegi damýy, elimizdiń sý júıesi qaýipsizdigi, shóleıttený máseleleri, transshekaralyq sý máseleleri, geografııanyń salalyq ǵylym retinde damýy, eko jáne bıoorta máseleleri, klımattyń ǵalamdyq ózgerýi men polıarlyq zertteýler, Qazaqstanda ekotýrızmdi damytý sııaqty máselelerdi qamtıdy.
2016 jyly geografııalyq qoǵammen 16 jobany iske asyrý boıynsha jumystar júrgizildi.
Aıta keteıik, byltyr 15-26 maýsymda QazaqGeography-nyń «Ulytaý-Aral» ekspedıtsııasy uıymdastyrylyp, onyń qorytyndysy boıynsha GPS júıesiniń kómegimen Kishi Araldyń mıkrobıologııasy jáne ǵaryshtyq baıqaý boıynsha derekter alyndy. Sol jyldyń mamyr-qarasha aılarynda Nomad 4x4 JK birge avtomobıl týrlaryna arnalǵan «Nomad 4x4» demalys kúndik marshrýttar» 11 marshrýty ázirlendi. Oǵan qosa, «Avalon» tarıhı-geografııalyq qoǵamymen birge Ulytaý óńiri boıynsha 3 tilde, qaltaǵa salatyn týrıstik jol kórsetkish shyǵaryldy. Al qyrkúıekte geoglıfterdiń ǵylymı áleýetin jáne óńirdiń týrıstik áleýetin baǵalaý maqsatynda torǵaı geoglıfterine aldyn ala barlaý ekspedıtsııasy ótkizildi. 2016 jyldyń jeltoqsanynan 2017 jylǵy qańtar aralyǵynda Qazaq geografııalyq qoǵamymen birge Antarktıdaǵa «Táýelsizdik polıýsi» ǵylymı-zertteý ekspedıtsııasy uıymdastyryldy.
Taǵy bir aıta ketetin jaıt, stýdenttermen, oǵan qosa jas býynmen baılanysty odan ári damytý maqsatynda, sonymen qatar geografııa ǵylymyn damytý ári ilgeriletý úshin Nazarbaev Ýnıversıtetinde Nazarbaev Ýnıversıtetiniń stýdentterin biriktiretin «QazaqGeography» stýdenttik klýby iske qosyldy.
QazaqGeography qoǵamynyń 2017 jylǵa josparlaǵan is-sharalary byltyrǵy jylmen salystyrǵanda osal emes. Bıyl qoǵam 14 jobany júzege asyrýdy kózdep otyr. 2017 jyldyń alǵashqy jobasy «Kıeli Qazaqstan» Ortalyq jáne Batys Qazaqstannyń kıeli jerlerine ǵylymı-tanymdyq ekspedıtsııasy, ekspedıtsııa 2017 jyldyń 10-25 maýsym aralyǵynda ótedi. Qazaqstannyń tabıǵı, tarıhı jáne mádenı murasyn áıgileý maqsatynda 2017 jyldyń maýsym-qazan aılary aralyǵynda «Meniń Qazaqstanym» atty foto-baıqaý ótkiziledi. Odan keıin Orys geografııalyq qoǵamy (OGQ) men birlesip «Eń ádemi el» foto-kórmesi ótkiziledi. 2017 jyldyń 25-30 shilde aralyǵynda Qazaqstannyń soltústik-shyǵysynda ornalasqan Pavlodar oblysynda «Han Qoryq» jastar festıvali ótedi. Al 2017 jyldyń qyrkúıek aıynda Semeı qalasynda Imperatorlyq Orys geografııalyq qoǵamynyń Semeı bóliminiń 115 jyldyǵyna oraı «Qazaqstanda geografııa ǵylymynyn damýy jáne qorshaǵan ortany qorǵaý máseleleri» ǵylymı-praktıkalyq konferentsııasy ótedi.
Aıta keteıik, QazaqGeography geografııalyq qoǵamyna kirý úshin aldymen qazaqgeography.kz saıtyna tirkelý qajet. Múshelik qoǵamnyń is-sharalaryna qatysýǵa quqyq beredi.
