QazaqGeography 5 jylda 60-qa jýyq joba ázirledi

ASTANA. QazAqparat - Astanada 17 qarasha kúni QR Premer-Mınıstriniń birinshi orynbasary - QazaqGeography tóraǵasy Asqar Mamınniń tóraǵalyq etýimen «QazaqGeography» respýblıkalyq qoǵamdyq birlestiginiń sezi ótti, dep habarlaıdy QazAqparat QR Premer-Mınıstriniń baspasóz qyzmetine silteme jasap.

Oǵan QazaqGeography qamqorshylyq jáne basqarýshy keńesteriniń músheleri, Qazaqstannyń barlyq óńirlerinen kelgen ókilderi qatysty.

Shara QazaqGeography birlestiginiń jańa keńsesinen bastaldy. 1968 jyly salynǵan ǵımarat qysqa merzimde kúrdeli jóndelip, mýzeıi, elektrondy kitaphanasy, medıa ortalyǵy da bar zamanaýı keńsege aınalǵan.

QazaqGeography tóraǵasy A.Mamın ǵalymdardyń, mádenıet qaıratkerleriniń, túrli sala mamandary jáne jastardyń, jalpy, Qazaqstannyń tarıhı-mádenı murasyna janashyr jandardyń basyn qosyp otyrǵan osy uıym qyzmetiniń mańyzdylyǵyn atap kórsetti.

Onyń aıtýynsha, «QazaqGeography ǵylym jáne mádenıet ortalyǵy bola otyryp, elimizdiń mádenı kodyn saqtaýǵa úles qosady. Onyń mańyzyn Elbasy N.Á. Nazarbaev «Bolashaqqa baǵdar: qoǵamdyq sanany jańǵyrtý» atty baǵdarlamalyq maqalasynda ashyp kórsetken bolatyn.

QazaqGeography basqarma tóraǵasy Jana Rústem birlestiktiń esepti kezeńdegi qyzmetin qorytyndylaı otyryp, sońǵy 5 jylda 60-qa jýyq joba iske asyrylǵanyn, 10 ekspedıtsııa uıymdastyrylyp, 13 kitap jaryq kórgenin jetkizdi. 2015 jyldan beri jyl saıyn ótkizilip otyrǵan «Han qoryq» jastar festıvali halyqaralyq mártebege ıe bolyp otyr.

Onyń aıtýynsha, «Kazakh Tourism» UK» AQ-men yntymaqtastyq aıasynda QazaqGeography «Uly Dala Eline saıahat» jobasyna qatysyp, Ulytaýǵa, Shoqan Ýálıhanovtyń izimen Qashqarııaǵa, Torǵaı geoglıfterine, Aral teńizine ekspedıtsııa uıymdastyrǵan. Jyl saıyn elimizdiń qasıetti mekenderine «Kıeli Qazaqstan» ekspedıtsııasy uıymdastyrylady.

Sezd jumysyn qorytyndylaı otyryp, A. Mamın «Tabıǵat», «Adamdar», «Qalalar», «Astana» taqyryptary boıynsha «Meniń Qazaqstanym» fotobaıqaýynyń jeńimpazdaryn marapattady.