QazaqGazAimaq Qyzylorda fılıaly taǵy qomaqty aıyppul tóledi

QYZYLORDA. KAZINFORM – QazaqGazAimaq AQ Qyzylorda óndiristik fılıalyna tabıǵı monopolııalar týraly zańnama talabyn buzǵany úshin qosymsha 18,3 mln teńge kóleminde ákimshilik jaza qoldanyldy. Bul týraly Tabıǵı monopolııalardy retteý komıtetiniń Qyzylorda oblysy boıynsha departamenti málimdedi.

Komıtet fılıal qyzmetinde anyqtalǵan zańbuzýshylyqtar týraly aqparat jarııalady. Atap aıtqanda, rettelip kórsetiletin qyzmetterge qosylý úshin tehnıkalyq shart berý kezinde fılıal tutynýshylardan zańnamada kózdelmegen qosymsha talaptar qoıyp, qujattar talap etken.

Al bul tutynýshylardyń quqyqtaryna jáne zań normalaryna qaıshy. Departament pen fılıal arasyndaǵy sot protsesi aıaqtalǵannan keıin fılıaldyń kinási tolyq dáleldendi. 

QazaqGazAimaq ókildigine buǵan deıin 61,3 mln teńge kóleminde aıyppul salynǵan bolatyn. Osylaısha jalpy ákimshilik aıyppul somasy 79,6 mln teńgege jetti. Ákimshilik aıyppul tolyq kólemde tólenip, memleket bıýdjetin tolyqtyrdy.