QazaqGaz jáne Teńizshevroıl gaz jetkizý týraly uzaq merzimdi kelisimge qol qoıdy
ASTANA. KAZINFORM – «QazaqGaz» UK» AQ Basqarma tóraǵasy Sanjar Jarkeshov pen «Teńizshevroıl» JShS (TShO) bas dırektory Kevın Laıon taýarlyq gazdy satyp alý-satý týraly uzaq merzimdi kelisimshartqa qol qoıdy.
Qol qoıylǵan qujat Qazaqstannyń ishki naryǵyna taýarlyq gazdyń turaqty jetkizilýin qamtamasyz etýge jáne ulttyq kompanııa men munaı-gaz salasyndaǵy jetekshi kásiporyndardyń biri arasyndaǵy yntymaqtastyqty nyǵaıtýǵa baǵyttalǵan.
– Ekonomıkanyń damýy ishki naryqta taýarlyq gazdy tutynýdyń aıtarlyqtaı ósýine ákeldi. QazaqGaz úshin halyq pen otandyq kásiporyndardy gazben turaqty qamtamasyz etý basymdyq bolyp qala bermek. Bizdiń uzaq merzimdi seriktesimiz «Teńizshevroılmen» satyp alý-satý kelisimine qol qoıý Energetıka mınıstrligi men «Samuryq-Qazyna» qorynyń qoldaýymen múmkin boldy. Bul kelisim elimizde taýarlyq gaz resýrsynyń, gazdy qaıta óńdeý kóleminiń artýyna jáne gazdyń turaqty jetkizilýin qamtamasyz etýge yqpal etedi, - dep atap ótti «QazaqGaz» UK» AQ Basqarma tóraǵasy Sanjar Jarkeshov.
TShO kompanııasy ishki naryqqa taýarlyq gazdyń iri jetkizýshisi bolyp qala beredi jáne el úshin osy mańyzdy strategııalyq salada áleýetti múmkindikterdi zertteý úshin Qazaqstanmen yntymaqtastyqty jalǵastyrady.
– Bul kelisimge qol qoıý arqyly TShO Qazaqstan Respýblıkasyna eldiń ósip kele jatqan gaz qajettilikterin qamtamasyz etýde kómek kórsetýge daıyn ekenin kórsetedi. QazaqGaz kompanııasyna osy el úshin mańyzdy kelisimge qol jetkizý úshin TShO-men birlesip atqarǵan eleýli jumysy úshin alǵysymdy bildiremin, - dedi TShO bas dırektory Kevın Laıon.
