QazaqGaz: Temirtaý men Jezqazǵanda gaz mamandarynyń vahtalyq keshenderi iske qosyldy
QARAǴANDY. KAZINFORM — Qaraǵandy oblysyna issapar aıasynda «QazaqGaz» UK» AQ basqarma tóraǵasy Álibek Jamaýov gaz obektileriniń jylytý maýsymy kezindegi jumysyn tekserip, vahtalyq personalǵa arnalǵan jańa keshendermen tanysty.
Vahtalyq keshen Temirtaý jáne Jezqazǵan jelilik-óndiristik basqarmalarynyń qyzmetkerlerine arnap salyndy. Bul qurylymdar QazaqGaz kompanııasynyń enshiles uıymy — «Intergaz Ortalyq Azııa» AQ qaramaǵynda. Ár keshen ornalasqan jer teliminiń aýmaǵy — 10 150 m², al qurylys alańy — 1 172,42 m².
Jumysshylarǵa arnalǵan qolaıly jaǵdaı
Ár keshenniń quramynda:
• 23 qyzmetkerge arnalǵan ákimshilik-turmystyq ǵımarat (jumys kabınetteri, oqý synyby, muraǵat, server bólmesi, medıtsınalyq jáne emshara kabınetteri);
• 12 adamǵa arnalǵan jataqhana (turý, demalý, as daıyndaý jáne tamaqtaný bólmeleri);
• zamanaýı jabdyqtalǵan jattyǵý zaly;
• kir jýý, útikteý, arnaıy kıimderdi keptirýge arnalǵan bólmeler;
• dýsh jáne kıim sheshetin bólmeler;
• baqylaý-ótkizý pýnkti — beınebaqylaý jáne kirýdi baqylaý júıelerimen jabdyqtalǵan.
«QazaqGaz» UK» AQ basshysy Álibek Jamaýov eńbek adamdaryna jaǵdaı jasaý kompanııa jumysynyń negizgi qaǵıdattarynyń biri ekenin atap ótti.
— Qyzmetkerlerge qamqorlyq jasaý, óndiristik nysandarda qolaıly eńbek jaǵdaıyn qalyptastyrý — kompanııamyzdyń basty ustanymy. Jumysshy mamandyqtar jyly aıasynda eńbek adamdaryna degen qamqorlyq erekshe mártebege ıe boldy. Zamanaýı vahtalyq keshenderdiń iske qosylýy vahtashylardyń ómirin uıymdastyrýdy jańa deńgeıge kóteredi jáne jumys tıimdiligine tikeleı áser etedi, — dedi ol.
Jyldam salynǵan áleýmettik nysandar
Jańa keshender buryn qoldanylǵan ýaqytsha vagon úıler men jaldamaly baspanalardyń ornyn basty. Áleýmettik nysandar belgilengen merzimnen buryn — bar bolǵany 7 aı ishinde paıdalanýǵa berildi.
Qurylystyń jyldam aıaqtalýyna fýnktsıonaldylyǵy joǵary, jylý únemdeıtin jáne dybys oqshaýlaýy kúsheıtilgen zamanaýı blokty-modýldik konstrýktsııalardy qoldaný múmkindik berdi.
Jylytý maýsymy jáne qaýipsizdik máselesi
Sonymen qatar, Álibek Jamaýov Qaraǵandy jáne Ulytaý oblystaryndaǵy jylytý maýsymynyń ótý barysymen tanysty. Buǵan deıin gaz ınfraqurylymyna aǵymdaǵy jóndeý jumystary júrgizilip, jalpy uzyndyǵy 50,7 km gaz qubyrlaryna aspaptyq tekserý jasalǵan.
Turmysta gazdy qaýipsiz paıdalaný máselesine erekshe kóńil bólinip otyr. Tótenshe jaǵdaı departamentterimen birlesip turǵyndarǵa SMS-habarlamalar joldanyp, túsindirý jumystary júrgizilip jatyr. Fılıaldyń jedel áreket etýi úshin 16 arnaıy tehnıkamen jabdyqtalǵan avtoparki bar.
Gaz mamandary turǵyndardy tabıǵı gazdy paıdalanýda qaýipsizdik talaptaryn qatań saqtaýǵa shaqyrady: úı-jaıdy jıi jeldetip, gaz jabdyqtaryn qaraýsyz qaldyrmaýdy jáne gaz ıisi sezilgen jaǵdaıda dereý «104» nómirine habarlasýdy eskertedi.