QazaqGaz Barhannaıa ken ornyn iske qosty
TARAZ.KAZINFORM- Jambyl oblysynda Amangeldi tobyna kiretin Barhannaıa gaz ken orny iske qosyldy. Sharaǵa «QazaqGaz „UK“ AQ Basqarma tóraǵasy Álibek Jamaýov qatysty.
Joba Energetıka mınıstrligi bekitken elimizdegi gazdyń resýrstyq bazasyn keńeıtý jónindegi jol kartasy sheńberinde iske asyryldy. Іske qosý rásimi telekópir formatynda ótti.
Jobanyń arqasynda jańa jumys oryndary qurylyp, memlekettik bıýdjetke qosymsha túsimder túsedi dep kútilýde. Ken ornyn ıgerýden túsken jıyntyq salyq tólemderi men kelisimsharttyq mindettemeler 18,6 mlrd teńgege baǵalanady.
— Barhannaıa ken ornyn iske qosý — bul gazdyń resýrstyq bazasyn ulǵaıtý jónindegi júıeli jumystyń nátıjesi jáne eldiń energetıkalyq qaýipsizdigin nyǵaıtýǵa qosqan mańyzdy úlesimiz, — dep atap ótti Álibek Jamaýov.
Іske qosýǵa daıyndyq sheńberinde QazaqGaz Barlaý jáne óndirý kompanııasy gaz jınaý pýnkti men Barhannaıa–Amangeldi gaz qubyryn salýdy qosa alǵanda, ken ornyn jaılastyrý boıynsha keshendi jumysty aıaqtady.
Sondaı-aq, buryn burǵylanǵan B-5 uńǵymasyn rekonservatsııalaý jáne qazirgi ýaqytta ıgerý kezeńi aıaqtalatyn B-6 paıdalaný uńǵymasyn burǵylaý jumystary júrgizildi.
Jeltoqsan aıynda Úkimet jerdi orman qorynan ónerkásiptik sanatqa aýystyrýdy maquldady, bul ónerkásiptik óndiristi bastaý úshin qajetti barlyq zańdy jáne ınfraqurylymdyq protsedýralardy aıaqtaýǵa múmkindik berdi.
Ken ornynda gaz óndirý 2026 jyly shamamen 30 mln tekshe metrdi quraıdy, al eń joǵary deńgeı 2028 jylǵa qaraı shamamen 65 mln tekshe metr bolady degen boljam bar.