«QazaqGaz Aimaq» 30 myńnan astam abonentten negizsiz aqy alǵan

QYZYLORDA. KAZINFORM – Qyzylorda oblysy boıynsha ekonomıkalyq tergep-tekserý departamenti «QazaqGaz Aimaq» AQ Qyzylorda fılıalynyń 2021-2023 jyldary tutynýshylardan zańsyz tólem alǵanyn anyqtady. Bul týraly departamenttiń baspasóz qyzmeti habarlady.

Atap aıtqanda, gazǵa bastapqy qosylý, jabdyqtarǵa qosý jáne esepke alý qurylǵylaryn plombalaý qyzmetteri úshin 30 myńnan astam abonentten shamamen 196 mln teńge negizsiz aqy alynǵan.

- Atalǵan áreketter Tabıǵı monopolııalar týraly zańnyń 26-babynyń 2-tarmaǵyna qaıshy. Zańbuzýshylyqty joıý jáne tutynýshylarǵa qarajatty qaıtarý úshin departament Qyzylorda oblysy boıynsha tabıǵı monopolııalardy retteý departamentine usynys joldady. Fılıal uıǵarymmen kelispeı, sotqa talap aryz túsirgenimen sot sheshimi boıynsha tabıǵı monopolııalardy retteý departamentiniń uıǵarymy zańdy dep tanyldy, - delingen habarlamada.

Zańsyz alynǵan qarajatty tutynýshylarǵa qaıtarý baǵytynda naqty sharalar qabyldanady. Sonymen qatar Qyzylorda qalasynyń mamandandyrylǵan aýdanaralyq sotynyń sheshimimen kompanııa fılıalyna 19,3 mln teńge aıyppul salynyp, ákimshilik jaýapkershilikke tartyldy.

Buǵan deıin Básekelestikti qorǵaý jáne damytý agenttigi kóterme jáne bólshek saýda naryǵyna júrgizgen taldaý nátıjesinde áýe otyny qunynyń negizsiz ósý faktilerin anyqtaǵan bolatyn.