QazaqGaz 535,5 mlrd tekshe metr gaz qory bar 15 ýchaskeni barlap jatyr
ASTANA. KAZINFORM — QazaqGaz ulttyq kompanııasy 535,5 mlrd tekshe metr gaz qory bar 15 ýchaskeni barlap jatyr. Bul týraly Energetıka mınıstri Erlan Aqkenjenov Úkimet otyrysynda málim etti.
— «QazaqGaz» ulttyq kompanııasy qazirgi ýaqytta memlekettik jer qoınaýy qoryn basqarý baǵdarlamasyna engiziletin 15 ýchaskede jumystar júrgizip jatyr. Búgingi tańda QazaqGaz-dyń «Aqqudyq» jáne «Shalqar» ýchaskelerindegi «QOR» Munaı Kompanııasy» aktsıonerlik qoǵamy sııaqty áleýetti ınvestordyń, KT-III ýchaskesindegi Chevron (AQSh) kompanııasymen, Severnyı-2 ýchaskesindegi «QazAzot» JShS-men geologııalyq barlaý jumystaryn júrgizý boıynsha kelisimderi bar jáne «SNPS-Aqtóbemunaıgaz» AQ-men Severnyı-1 ýchaskesi boıynsha kelissózder júrgizilip jatyr. Sondaı-aq, Gas Solution áleýetti ınvestory «Samtyr Soltústik» jáne «Samtyr Ońtústik» ýchaskeleri boıynsha qyzyǵýshylyq tanytýda. Aldyn ala baǵalaý boıynsha, joǵaryda atalǵan barlyq joba boıynsha gazdyń jıyntyq resýrstary shamamen 535,5 mlrd tekshe metr gaz jáne jıyntyq quny 200 mlrd teńgeni quraıdy, — dedi vedomstvo basshysy.
Sondaı-aq, ol 2026-2030 jyldar aralyǵynda 4 gaz óńdeý zaýytyn kezeń-kezeńimen paıdalanýǵa berý bastalatynyn atap ótti.
Olar:
— qýattylyǵy jylyna 1 jáne 2,5 mlrd tekshe metr bolatyn Qashaǵan ken orny;
— qýattylyǵy jylyna 4 mlrd tekshe metr bolatyn Qarashyǵanaq ken ornynyń shıkizat bazasy;
— Jańaózen qalasyndaǵy qýattylyǵy jylyna 900 mln tekshe metr bolatyn gaz óńdeý zaýyty.
Eske salsaq, Prezıdent Qasym-Jomart Toqaev Jańaózen gaz óńdeý zaýyty qurylysynyń keshigýin Úkimettiń óreskel olqylyǵy retinde baǵalaǵan edi.
Osyǵan deıin Premer-mınıstr Oljas Bektenov QazaqGaz ulttyq kompanııasynyń basqarma tóraǵasy Sanjar Járkeshevke saladaǵy problemalardy ashyp aıtpaǵany úshin eskertý jasady.
Sonymen qatar Qazaqstan 3 aıda 17,2 mlrd tekshe metr gaz óndirgeni belgili boldy.