QazaqGaz 30 perspektıvaly ýchaskede barlaý jumystaryn jalǵastyrady
ASTANA. KAZINFORM — «QazaqGaz» ulttyq kompanııasy gaz qoryn tolyqtyrý maqsatynda bıyl tórt barlaý ýchaskesinde seısmıkalyq zertteý júrgizip, úsh barlaý uńǵymasyn burǵylaýdy josparlap otyr.
Bul týraly Úkimet otyrysynda «QazaqGaz» UK AQ basqarma tóraǵasy Álibek Jamaýov málim etti.
Onyń aıtýynsha, kompanııanyń 2025 jylǵy jumysynyń qorytyndysy boıynsha magıstraldyq gaz tasymalynyń kólemi 88,9 mlrd tekshe metrdi qurady. Іshki naryqqa 20,5 mlrd tekshe metr gaz jetkizilip, Qytaıǵa 5 mlrd tekshe metr gaz eksporttaldy. Kompanııanyń taza paıdasy 270,9 mlrd teńgege jetse, ishki naryqty sýbsıdııalaýǵa 226,3 mlrd teńge baǵyttaldy. Sonymen qatar memleket bıýdjetine 325,8 mlrd teńge salyq tólendi.
Álibek Jamaýovtyń málimetinshe, búginde QazaqGaz barlaý jumystary boıynsha 6 kelisimshartqa ıe, al perspektıvaly ýchaskelerdiń sany 30-ǵa jetken. Bıyl Soltústik-1, Soltústik-2, Saryaljyn jáne Maldybaı ýchaskelerinde seısmıkalyq barlaý jumystary júrgiziledi.
— Zertteý nátıjeleri boıynsha bıyl úsh barlaý uńǵymasyn burǵylaýdy josparlap otyrmyz. Onyń biri Maldybaı ýchaskesinde, ekeýi Saryaljynda ornalasady, — dedi kompanııa basshysy.
Sondaı-aq ol Memlekettik jer qoınaýyn basqarý baǵdarlamasy aıasynda 2026-2027 jyldary geologııalyq barlaý jumystary keńeıtiletinin aıtty. Atap aıtqanda, 11 myń shaqyrymnan astam aýmaqta 2D seısmıkalyq zertteý júrgizilip, geohımııalyq jáne geofızıkalyq jumystar atqarylady. Bıyl mundaı jumystar 13 ýchaskede bastalady.
Budan bólek, Batys Qazaqstan oblysyndaǵy Kamenkovskıı perspektıvalyq blogynda Eni kompanııasymen birlesken zertteýler bastalǵan. Al Aqtóbe oblysyndaǵy KT-3 perspektıvalyq blogy boıynsha áleýetti ınvestorlarmen kelissózder júrgizilip jatyr.
Aıta keteıik, Qazaqstanda gazdandyrý deńgeıi 64,2% jetkeni belgili boldy.
