Qazaq Tili Endowment qurylymynda Counsel ınstıtýtyn qurý qajet — Dýlat Tastekeı
ASTANA. KAZINFORM — Qazaq Tili Endowment qurylymynda Counsel ınstıtýtyn qurý qajet. Mundaı usynysty Halyqaralyq «Qazaq tili» qoǵamynyń jyldyq qorytyndy quryltaıynda atalǵan qoǵamnyń vıtse-prezıdenti Dýlat Tastekeı jasady.
— Bıyl strategııalyq turǵydan durys sheshim qabyldadyq. Qazaq Tili Endowment qory Astana halyqaralyq qarjy ortalyǵynyń — AHQO-nyń ıýrısdıktsııasynda qaıta tirkeldi. Bul sheshimniń mańyzdylyǵy birinshiden, AHQO aǵylshyn quqyǵyna negizdeledi jáne halyqaralyq standarttarmen jumys isteıdi. Mundaı quqyqtyq orta — endaýment sııaqty uzaq merzimdi kapıtaldy qorǵaý, ósirý jáne ashyq basqarý úshin eń senimdi alań. Biz osy arqyly qordyń bolashaqtaǵy turaqtylyǵyn qamtamasyz ettik. Ekinshiden, AHQO-da tirkelgen qor — jeke, derbes zańdy tulǵa retinde naqty basqarý qurylymyna ıe. Bul qurylym Guardians, Council sııaqty ınstıtýttar arqyly júıeli, ashyq jáne kásibı basqarýdy qamtamasyz etedi. Úshinshiden, qazirgi tańda Qazaqstan aýmaǵynda jumys istep turǵan burynǵy endaýment qordaǵy barlyq qarajat mindetti sharttar merzimi aıaqtalǵan soń AHQO-daǵy qorǵa tolyq aýdarylady. Osylaısha biz búkil kapıtaldy bir ortalyqta jınaqtap, ony uzaq merzimdi strategııaǵa saı basqara alamyz, — dedi «Qazaq tili» qoǵamynyń vıtse-prezıdenti.
Osy oraıda ol quryltaı qatysýshylarynyń nazaryn halyqaralyq tájirıbede jáne AHQO ıýrısdıktsııasynda endaýment qorlarynyń qyzmetinde mańyzdy ról atqaratyn ınstıtýttyń biri — Counsel, ıaǵnı, qordyń quqyqtyq jáne qurylymdyq keńesshisi bolatynyna nazar aýdartty.
Onyń paıymynsha, mundaı fýnktsııanyń bolýy mynadaı sebepterge baılanysty óte qajet:
— barlyq protsesterdiń ashyqtyǵyn qamtamasyz etý;
— qujat aınalymyn, ınvestıtsııalyq kelisimderdi jáne basqarý aktilerin halyqaralyq standarttarǵa saı júrgizý;
— Guardians Board, Council jáne Founder arasyndaǵy quqyqtyq úılesimdilikti qamtamasyz etý;
— AHQO talaptaryna saı korporatıvtik basqarýdy tolyqqandy engizý.
— Sondyqtan endaýment qorynyń qurylymynda resmı túrde Counsel ınstıtýtyn qurý jáne onyń mindetterin naqty bekitý qajet. Bul qadam qorymyzdyń basqarý sapasyn kúsheıtedi, jaýapkershilikti arttyrady jáne ınvestorlar men donorlar úshin ashyqtyqty qamtamasyz etedi. Endaýment — bul búgingi emes, bolashaq urpaq úshin jasalǵan qarjylyq negiz. Biz AHQO-ǵa kóshý arqyly durys qadam jasadyq. Endi osy júıeni tolyqqandy, zamanaýı deńgeıge jetkizý úshin Counsel ınstıtýtyn engizý — kelesi logıkalyq jáne qajetti qadam, — dedi Dýlat Tastekeı.
Buǵan deıin elordada Halyqaralyq «Qazaq tili» qoǵamynyń jyldyq qorytyndy quryltaıy ótkenin, Qazaq Tili Endowment qoryna 700 mıllıon teńgeden asa qarajat jınalǵanyn jazǵan edik.