QAZAQ TILI Endowment qoryna 500 mln teńge jınaldy

ASTANA. KAZINFORM – QAZAQ TILI Endowment qoryna 500 mln teńge jınaldy. Bul týraly Senatta Qazaq Oxford Dictionary sózdiginiń tanystyrylymynda Halyqaralyq «Qazaq tili» qoǵamdyq birlestiginiń prezıdenti Raýan Kenjehanuly aıtty.

«Qazaq tili» qoǵamdyq birlestiginiń ary qaraı tynys-tirshiligine demeý kórsetetin, negiz bolatyn Endowment degen qor quryldy. Qorǵa Memleket basshysy birinshi bolyp óz qaltasynan jarna saldy. Sol jolmen qazirgi ýaqytta kásipkerler, qoǵam ókilderi qarajat aýdaryp jatyr. Búginde jarty mlrd teńgedeı qarajat jınaqtaldy. Ol qarajat jumsalmaıdy, basqarylady. Osy arqyly qor bizdiń kúndelikti qyzmetimizge, túrli jobalarymyzǵa negiz bolady», - dedi ol.

Qoǵamdyq birlestik prezıdentiniń atap ótýinshe, mundaı qor álemniń kóptegen elinde bar.

«Máselen, Túrkııada «Til» qory bar. «Tarıh» qory da jumys isteıdi. Ulybrıtanııada British Council, ıspan tilin qoldaýmen aınalysatyn Servantes ınstıtýty, Qytaıda Konfýtsıı ınstıtýty, Reseıde «Rýskıı mır» qoǵamdyq qory bar. Sondyqtan osy tájirıbeni Qazaqstanǵa ákelip, «Qazaq tili» qoǵamdyq birlestigine engizý úshin jumys istep jatyrmyz. Qoldaý kórsetip jatqan azamattar az emes. Biraq, bizdiń oıymyzsha, bul úlken bastamalardyń alǵashqy qadamy ǵana», - dedi Raýan Kenjehanuly.