«Qazaq Organicfood» halyqaralyq naryqqa shyǵýǵa áleýeti bar – Memleket basshysy
ASTANA. KAZINFORM — Bul týraly Memleket basshysy Qasym-Jomart Toqaev Aýyl sharýashylyǵy eńbekkerleriniń ekinshi forýmynda aıtty.
Prezıdent elimiz astyq eksporty boıynsha álemdegi jetekshi 10 memlekettiń qataryna kiretinin aıtty.
— Strategııa durys túzilse, «Qazaq Organicfood» brendi halyqaralyq naryqta laıyqty ornyn alady. «Ónimderimizdi halyqaralyq naryqqa kóptep shyǵarýymyz kerek. Elimiz astyq eksporty boıynsha álemdegi jetekshi 10 memlekettiń qataryna kiredi.
Sonymen qatar un eksporttaý isinde kósh bastap tur. Qazaqstan astyǵy Ortalyq Azııa, Iran, Aýǵanstan elderi sekildi dástúrli naryqtarmen qatar Eýropa, Ońtústik-Shyǵys Azııa men Soltústik Afrıkaǵa, atap aıtqanda, Belgııa, Portýgalııa, Norvegııa, Ulybrıtanııa, Vetnam, Marokko, Aljır memleketterine de jetkizile bastady. Bul bizdiń astyq eksporty geografııasynyń keńeıip kele jatqanyn kórsetedi, — dedi Qasym-Jomart Toqaev.
Agroónerkásip kesheni ónimderiniń eksporty 5 mıllıard dollardan asady.
— Elimiz maıly daqyldar men ósimdik maıyn da kóptep syrtqa shyǵara bastady. Ótken jyly biz halyqaralyq naryqqa 18 myń tonnaǵa jýyq qoı etin shyǵaryp, osy sala boıynsha 10 ozyq memlekettiń qataryna endik. Degenmen áleýetimiz budan da mol.
Jalpy, agroónerkásip kesheni ónimderiniń eksporty 5 mıllıard dollardan asady. Aýyl sharýashylyǵy ónimderiniń 200-den astam túri 70 memleketke eksporttalady.
Agroónerkásip keshenindegi áleýetimiz bul kórsetkishten áldeqaıda joǵary. Onyń ústine álemde ekologııalyq turǵydan taza azyq-túlik ónimderine suranys artyp keledi. Sondyqtan strategııa durys túzilse, «Qazaq Organicfood» brendi halyqaralyq naryqta laıyqty ornyn alady.
Elimizde organıkalyq ónimder shyǵarý standarttary bekitildi. Osy baǵyttaǵy júıeli jumysty jalǵastyrý qajet. Brendterimizdi keńinen nasıhattaýǵa barynsha qoldaý kórsetý — salalyq qurylymdar men elshilikterdiń mindeti, — dedi Prezıdent.
Aıta ketelik Toqaev agroónerkásip keshenindegi aqparattyq júıelerdi ıntegratsııalaýdy tapsyrdy.