Qazaq Digital Mektebi jobasy aýyl mektepterindegi bilim sapasyn arttyrýǵa jol ashady
ASTANA. KAZINFORM – Oqý-aǵartý mınıstri Juldyz Súleımenova men «Qazaqstan halqyna» qorynyń basqarma tóraǵasy Lázzat Shyńǵysbaeva elimizdegi aýyl men qala mektepteriniń arasyndaǵy bilim alshaqtyǵyn joıý máselelerin talqylady.
Kezdesý barysynda «Qazaq Digital Mektebi» ınnovatsııalyq jobasyn qarjylandyrý jáne oǵan ınvestorlardy tartý tetikteri qarastyryldy.
«Qazaq Digital Mektebi» jobasy qyrkúıek aıynda elimizdiń jeti oblysynda pılottyq rejımde iske qosylady. Pılottyq joba aıasynda Soltústik Qazaqstan, Qostanaı, Aqmola, Pavlodar, Batys Qazaqstan, Aqtóbe jáne Shyǵys Qazaqstan oblystaryndaǵy shaǵyn jınaqty mektepterdi qamtý josparlanýda. Qazirgi tańda arnaıy tujyrymdama bekitilip, tańdap alynǵan mektepterdiń tehnıkalyq jaǵdaıy zerdelenýde. Jergilikti atqarýshy organdarmen birlese otyryp, bilim oshaqtaryn zamanaýı qurylǵylarmen jabdyqtaý jáne sapaly tsıfrlyq ınfraqurylymmen qamtý jumystary júrip jatyr.
Baǵdarlamanyń negizgi maqsaty — aýyl mektepteri úshin oqytýdy basqarýdyń ulttyq platformasyn engizý jáne ol platformany biregeı tsıfrlyq bilim berý kontentimen qamtý. «Qazaq Digital Mektebi» jobasynyń sátti oryndalýy aýyl balalaryna básekege qabiletti bilim alýǵa múmkindik berip, elimizdiń adamı kapıtalyn damytýdyń negizgi qozǵaýshy kúshine aınalady.
Aıta ketelik oqýshylardyń mamandyq tańdaýyna qatysty monıtorıng bastalǵany týraly jazǵan edik.
