Qazaq Bubble: Ǵylymdy qazaq tilinde sóıletken joba

ASTANA. KAZINFORM — Ǵylym kúrdeli emes. Ony durys ári qyzyqty jetkize bilseń bolǵany. Osy qaǵıdany ustanǵan Qazaq Bubble jobasy bıyl 5 jyldyq mereıtoıyn atap ótpek.

Qazaq tilindegi tanymdyq kontent ázirleıtin bul joba búginde áleýmettik jelilerdegi júz myńdaǵan jastardyń suranysyna ıe.

Jobanyń avtory, lıngvıst Beıbarys Seıtaq ǵylymdy qalaı kreatıvti tilmen «sóıletip» júrgenderin baıandap berdi.

— Men lıngvıstpin. Al áriptesim Gúlnur — hımık-ınjener. Jobanyń taǵy bir múshesi — zaıyrly dintanýshy. Mamandyǵymyz ártúrli bolǵan soń, ártúrli ǵylym salalaryn qamtımyz. Men lıngvıst bolǵandyqtan, adamdar lıngvıstıkanyń ne ekenin túsinbeıtinine buryn nalyp, renjıtin edim. Sodan adamdarǵa ǵylymdy jeńil tilmen jetkizip, túsindiretin joba ashaıyq degen ıdeıa keldi, — deıdi Qazaq Bubble jobasynyń avtory Beıbarys Seıtaq.

Jobada jumys isteıtin quram árbir aqparatty tekserip, durystyǵyna kóz jetkizgen soń ǵana oqyrman nazaryna usynatyndaryn aıtady.

— Biz bastapqyda jobany Instagram paraqshasynda ǵana júrgizetinbiz. Alǵashynda mátindik posttar salatynbyz. Lıngvıstıka týraly jazyp júrdik, keıinnen jalpy ǵylym salalaryn da qamtı bastadyq. 2024 jyldyń basynan bastap reels formatynda vıdeolar shyǵara bastadyq. Biz barlyq ǵylym salasyn qamtýǵa tyrysamyz. Sonyń ishinde fact-check-ke de kóp kóńil bólemiz. Mysaly, bıologııa taqyrybyn qozǵaıtyn bolsaq, ony tanys bıolog mamanmen aqyldasyp ázirleımiz. Sonymen qatar úshinshi múshemiz — zaıyrly dintanýshy. Ol din tarıhy týraly materıaldar daıyndaıdy. Onyń zertteý aıasynda jalpy dinnen bólek mıfologııa, adamzattyń antropologııalyq tarıhy da qamtylady, — deıdi joba avtory.

Qazaq Bubble-dyń keń kólemdegi ǵylymı kontentterin YouTube platformasynan da kóre alasyzdar.

— Instagram-da qysqa aqparattarmen bólisemiz. Al YouTube-ta 20–30 mınýttyq vıdeolardy júkteımiz. Adamdar YouTube-ty qosyp qoıyp, tamaqtanyp otyryp-aq vıdeolarymyzdy kóre alady. Vıdeolarymyzdy vıdeo-esse nemese derekti fılm formatyna jatqyzýǵa bolady. Ǵylymı bir taqyrypty jan-jaqty taldap, túrli grafıka, arnaıy effektiler, erekshe stsenarıı kómegimen kórermenge jetkizemiz. Buǵan deıin atom energetıkasy, ýaqyt, adamnyń bıologııalyq yrǵaqtary, áıel teńdigi syndy taqyryptardy taldadyq. Sońǵy vıdeomyz — áıel teńdigi týraly. Onda bul uǵymnyń Qazaqstandaǵy tarıhy, ekonomıkadaǵy mańyzy men róli qamtyldy. Vıdeolardy daıyndaýǵa qajetti qarajatty seriktesterimiz arqyly tabýǵa tyrysamyz. Keı kompanııalar da óz yqylastaryn bildirip, qoldaý kórsetip jatady, — deıdi Qazaq Bubble negizin qalaýshy.

Beıbarys Seıtaq kontent ázirleýde ıdeıany qaıdan alatyndaryn bólisti.

— Materıaldardy daıyndaý kezinde suranysqa mindetti túrde mán beremiz. Óıtkeni ınternetke qandaı da bir dúnıe salsań, adamdar eń birinshi «bul aqparat maǵan ne beredi?» degen turǵydan qaraıdy. Sondyqtan aqparatty adamdardyń ózine qandaı qatysy bar ekenin kórsetip, qazaqpen, Qazaqstanmen nemese ózekti jańalyqtarmen baılanystyra jetkizýge tyrysamyz, — deıdi ol.

Joba músheleriniń aıtýynsha, olar bul paraqshalardy jan lázzaty úshin júrgizedi.

— Bizdiń joba múshelerinde kásipkerlik qabilet joq. Biz bul jobany tek jan lázzaty úshin ǵana ashtyq. Joba músheleriniń jeke jumystary bar. Mysaly, men ýnıversıtette jumys isteımin. Bul jobany qoǵamǵa paıdamyzdy tıgizý úshin jáne ózimiz osy isti jaqsy kórgendikten júrgizip kelemiz. Dese de, qazir bizdiń turaqty seriktesterimiz bar. Biz olarmen seriktestik aıasynda kontentter túsiremiz. Qazaqsha dýblıajben aınalysatyn kompanııalarmen, jetkizý qyzmetin usynatyn kásiporyndarmen birlese jumys isteımiz. Seriktes tańdaǵanda eń aldymen olardyń bedeli men mıssııasyna, qundylyqtarynyń bizben sáıkestigine qatty mán beremiz, — deıdi Beıbarys Seıtaq.

Qazaq Bubble jobasynyń avtory ǵylym qazaq tilinde sóıleý kerek dep esepteıdi.

— Qazaq jastarynyń ǵylymǵa degen qyzyǵýshylyǵy óte joǵary deńgeıde. Suranys bar dep oılaımyn. Keı kompanııalar qazaqsha kontentti qoldaımyz degende, tar sheńberde oılanyp qalady — mindetti túrde oıý-órnek pen kıiz úı bolý kerek dep oılaıdy. Bul — kreatıvti kózqarastyń jetispeýi. Olar qazirgi Qazaqstannyń negizgi naryǵyna aınalǵan demografııalyq top — jastar ekenin eskermeıdi. Al jastardyń kóbi bul álemdi tanýǵa, zertteýge qumar. Biz ǵylym qazaq tilinde sóıleýi kerek dep esepteımiz, — deıdi lıngvıst.

Aıta keteıik, Jibek Joly» telearnasy Qazaqstandaǵy alǵashqy jobany júzege asyryp, mýltfılmderdi qazaqsha sýrdo-aýdarmaǵa avtomattandyrdy.