Qazaq Banki salymshylaryna ótem tóleý merzimi 1 mamyrǵa deıin uzartyldy

NUR-SULTAN. QazAqparat - Qazaqstannyń depozıtterge kepildik berý qory Qazaq Banki salymshylaryna agent bank - VTB Banki arqyly kepildik berilgen ótem tóleý merzimi 1 mamyryna deıin uzartylǵany jarııalady, dep habarlaıdy QazAqparat qordyń baspasóz qyzmetine silteme jasap.

Qor Qazaq Banki aldyndaǵy mindettemeleriniń jalpy somasynyń 99 paıyzyn oryndady. 2021 jyldyń 16 sáýirine deıin qalyptasqan jaǵdaı boıynsha atalmysh bank salymshylary agent bank arqyly 20,4 mlrd teńge kepildik berilgen ótemdi aldy. Ony alýǵa 6 myń adam nemese salymshylardyń 33 paıyzy ótinish bergen.

Qazir ótemdi almaǵan salymshylardyń shamamen 160 mln teńgesi qalǵan.

«Qazaq Banki» AQ salymshylary kepildik berilgen ótemdi alý jónindegi ótinishpen agent banktiń bólimshelerine júgine alady. Bul úshin www.vtb-bank.kz saıty nemese 5050 nómiri boıynsha (uıaly telefon arqyly tegin) anyqtama qyzmetinen fılıaldardyń jumys kestesi týraly aldyn ala bilýi kerek.

Eske salamyz, «Qazaq Banki» AQ depozıtinde, aǵymdaǵy jáne karta shotynda aqshasy bar salymshylar (jeke tulǵalar men kásipkerler) kepildik berilgen ótemdi alýǵa ótinish beredi. Kepildik mólsheri:

- ulttyq valıýtadaǵy qarajat boıynsha – 10 mln teńgeden;

- shetel valıýtasyndaǵy qarajat boıynsha – 5 mln teńgeden aspaıdy.

Salymshyda túri men valıýtasyna qaraı birneshe depozıt bolǵan jaǵdaıda, kepildik berilgen jıyntyq ótem, árbir depozıt túri boıynsha shekti mólsherdi eskere otyryp, 15 mln teńgeden aspaıdy.

Barlyq tólemder tek teńgede júzege asyrylady. Shetel valıýtasyndaǵy salymdar boıynsha ótem bankti taratý týraly sot sheshimi zańdy kúshine engen kúni – 2018 jylǵy 12 jeltoqsanda belgilengen valıýta aıyrbastaý baǵamy boıynsha esepteledi.