Qazaq Banki-niń jeke tulǵalarǵa depozıtter ashýǵa lıtsenzııasy toqtatyldy
ASTANA. QazAqparat - Búginnen bastap Qazaq Banki-niń jeke tulǵalarǵa depozıtter men shottar ashýǵa lıtsenzııasy toqtatyldy, dep habarlaıdy QazAqparat QR Ulttyq bankiniń baspasóz qyzmetine silteme jasap.
«Ulttyq banktiń 27 sáýirdegi qaýlysymen 2018 jyldyń 28 sáýirinen bastap 2018 jyldyń 27 shildesine deıin «Qazaq Banki» AQ-nyń jeke tulǵalardyń bank shottary men depozıtterin ashýǵa lıtsenzııasy toqtatyldy», - dep habarlady qarjy retteýshi.
Atalyp ótilgendeı, mundaı sheshim banktiń «QR bankteri men bank qyzmetteri týraly» Zańynyń 48-baby 1-tarmaǵyndaǵy talaptarynyń buzylýyna baılanysty qabyldandy.
Lıtsenzııa jeke tulǵalarǵa jańa depozıtter men jańa bank shottaryn ashý úshin toqtatyldy. Bul sharanyń banktiń qazirgi depozıtteri men klıentterine qyzmet kórsetýge qatysy joq.
2018 jyldyń 1 sáýirindegi jaǵdaı boıynsha Qazaq Banki-nde qabyldanǵan jeke tulǵalardyń depozıtter kólemi 41 mlrd teńgeni quraıdy.
