Qazaq Aqbas halyqaralyq yntymaqtastyq aıasyn keńeıtip jatyr
ASTANA. KAZINFORM — Qazaqtyń aqbas iri qara tuqymynyń respýblıkalyq palatasy — Qazaq Aqbas ókilderi AQSh-tyń Kanzas-Sıtı qalasynda ótken World Hereford Conference 2025 dúnıejúzilik konferentsııasyna qatysty. Bul týraly Aýyl sharýashylyǵy mınıstrligi habarlady.
Bul forýmǵa álemniń túkpir-túkpirinen jetekshi mamandar men gereford tuqymy qaýymdastyqtarynyń ókilderi jınaldy. Konferentsııa aıasynda qazaqstandyq delegatsııa eki mańyzdy yntymaqtastyq týraly memorandýmǵa qol qoıdy.
— Bul kelisimder halyqaralyq áriptestik baılanystardy nyǵaıtýǵa, selektsııalyq jáne tehnologııalyq tájirıbe almasýǵa, sondaı-aq birlesken ǵylymı-zertteý jáne óndiristik jobalardy júzege asyrýǵa baǵyttalǵan. Olar qazaqstandyq asyl tuqymdy mal sharýashylyǵyn damytýdyń jańa kezeńine jol ashpaq, — delingen aqparatta.
Atap aıtqanda, Irlandııa Hereford qaýymdastyǵymen jasalǵan memorandým aıasynda taraptar genetıkalyq materıaldarmen almasýdy, mal esebin júrgizýdiń zamanaýı tsıfrlyq júıelerin engizýdi jáne selektsııa men ónimdilikti baǵalaý salasyndaǵy mamandardyń biliktiligin arttyrýdy josparlap otyr.
— Irlandııalyq tarap Qazaq Aqbas uıymyn 2026 jyldyń 6–10 tamyzy aralyǵynda ótetin World Hereford Conference — 2026 konferentsııasyna resmı túrde shaqyrdy. Bul qazaqstandyq tuqymnyń álemdik deńgeıde moıyndalýy men senimniń joǵary deńgeıin kórsetedi, — dep qosty mınıstrlik.
Sondaı-aq genetıkalyq tehnologııalar men asyl tuqymdy mal ósirý salasyndaǵy jetekshi oıynshy Urugen kompanııasymen kelisimge qol qoıylýy da mańyzdy oqıǵa. Qazaqstan úshin Ýrýgvaıdyń orny erekshe. Dál osy elden 1928 jyly alǵashqy gereford buqalary ákelinip, qazaqtyń tanymal aqbas tuqymyn shyǵarý tarıhynyń jolyn ashqan edi.
— Arada júz jyldaı ýaqyt ótken soń, Qazaqstan men Ýrýgvaı arasyndaǵy tarıhı baılanys jańa, zamanaýı deńgeıde jalǵasyn taýyp otyr. Bul joly ol joǵary tehnologııalyq halyqaralyq áriptestik deńgeıine ótip, otandyq maldyń genetıkalyq sapasyn jaqsartýǵa jáne qazaqstandyq mal eksportynyń áleýetin arttyrýǵa baǵyttaldy, — delingen aqparatta.
Konferentsııa barysynda Dúnıejúzilik Gereford uıymynyń tóraǵasy Larrı Fını Qazaqstannyń óz selektsııalyq bazasyn damytýdaǵy jetistikterin joǵary baǵalap, Qazaq Aqbas tuqymy gereford jelisiniń Ortalyq Azııanyń dala jaǵdaıyna tabysty beıimdelýiniń aıqyn úlgisi ekenin atap ótti.
— Bul oqıǵalar Qazaq Aqbas brendiniń halyqaralyq deńgeıde moıyndalýy men onyń álemdik mal sharýashylyǵy qaýymdastyǵyndaǵy róliniń artyp kele jatqandyǵyn aıqyn kórsetti, — dep jazdy mınıstrlik.
Aıta keteıik, Aýyl sharýashylyǵy mınıstrliginiń málimetinshe, 2030 jyly eldegi iri qara mal sany 12 mıllıonǵa jetkiziledi.