Qazaq Air jolaýshylary Qyzylordadan Astanaǵa jete almaı otyr

QYZYLORDA. KAZINFORM – 26 qazan kúni Qyzylorda qalasyndaǵy Qorqyt ata halyqaralyq áýejaıynan túngi saǵat 22.30-da ushýy kerek bolǵan Qazaq Air  áýe kompanııasynyń jolaýshylary osy ýaqytqa deıin dittegen jerine jete almaı sandalyp júr. Qyzylorda-Astana reısiniń ashýǵa býlyqqan jolaýshylary Kazinform tilshisine shaǵymdandy. 

Solardyń biri – Samal Qańylbaeva. Keıipkerimizdiń aıtýynsha, ushaqtyń kókke kóterilýi birneshe ret keıinge qaldyrylǵan.

– Birese saǵat 22.30-dan 27 qazanǵa qaraǵan túngi saǵat 1.30-ǵa, birese 3.00-ge, odan keıin 4.15-ke aýystyryldy. Kompanııa ókilderi endi kelip 27 qazan kúni keshke 20.15-te ushatynymyzdy aıtty. Bizdi tań aldynda saǵat 5-te ǵana qonaqúıge ornalastyrdy. Sodan beri túski as ta bergen joq. Qazaq Air-den eń bolmasa eshkim baılanysqa shyqpady, - dedi ol. 

Al Gúlbaný Úsenqyzy Qyzylordǵa qydyryp kelip, endi otbasyna jete almaı júr. 

– Bala-shaǵam Astanada edi, qaýyshqansha asyǵyp otyrmyn. Biraq bulaı bolaryn bilmedik. Eshkim eshteńe túsindirýge asyqpaıdy. Qanshama adam qınalyp qaldy, - deıdi jolaýshy. 

Ózin Ardaq Bazarbaev dep tanystyrǵan áýe kompanııasynyń Qyzylordadaǵy resmı ókili áýejaıda jolaýshylarǵa Astanadan beri qaraı shyqqan ushaq tehnıkalyq aqaýǵa baılanysty keıin qaıtýǵa májbúr bolǵanyn jetkizgen. Reseıdiń Novosıbırsk ólkesinen basqa áýe kóligin aldyrmaq bolǵan eken, biraq ol da ushýǵa jaramsyz kúıge túsipti. Áýe kompanııasynyń resmı ókilimen biz de habarlasyp kórdik. 

– Keshe jolaýshylarǵa habarlaǵanymdaı, tehnıkalyq aqaýlarǵa baılanysty keshigip jatqannan basqa eshqandaı aqparat aıta almaımyn, - dedi Ardaq Bazarbaev. 

Jolaýshylar qazir Qyzylorda qalasyndaǵy qonaqúılerdiń birinde. Ushaq elordaǵa qaraı 70-ke jýyq jolaýshyny tasymaldaq bolǵan. Biri oqýyna, biri jumysyna jete almaı jolda bógelgen olar kompanııa basshylyǵynyń ózderine durystap kóńil bólmegenine, jaǵdaıdy jiti túsindirmegenine qapaly. Olar Qyzylorda stantsııasyndaǵy kóliktegi polıtsııa bólimine de shaǵym túsirdi. 

Qazaq Air áýe kompanııasynyń baspasóz qyzmetine habarlasqanymyzda bul máselege oraı keshirek málimdeme jasaıtynyn atap ótti. 

Eske salsaq, keıingi ýaqytta jeńil ushaqtardyń qatysýymen bolǵan avıatsııalyq apattardyń jıileýine baılanysty 25 tamyz ben 5 qyrkúıek aralyǵynda jalpy maqsattaǵy avıatsııany paıdalanýshylarǵa jospardan tys tekserý júrgizilgen edi.