QAZAQ AIR ushaǵy Almaty áýejaıyna shuǵyl qondy
ALMATY. QazAqparat - QAZAQ AIR ushaǵy tehnıkalyq aqaý saldarynan Almaty áýejaıyna shuǵyl qondy, dep habarlaıdy QazAqparat tilshisi.
Áýe kompanııasynyń baspasóz hatshysy Sergeı Hetsýrıanıdiń aıtýynsha, Almaty-Astana baǵytynda ushyp shyqqan Bombardier Q400 NextGen avıalaıneri qozǵaltqyshtaǵy maı qysymynyń ındıkatsııasynyń iske qosylýyna baılanysty áýejaıǵa qaıta qonýǵa májbúr bolǵan.
Ushaq ushyp shyqqannan soń 25 mınýttan keıin qaıta oralǵan.
«Ushaq shtattyq rejimde qondy. Bortta 4 ekıpaj múshesi men 75 jolaýshy bolǵan. Qazirgi tańda olarǵa ystyq tamaq, barlyq qajetti zattar berildi. IQ353 reısiniń jolaýshylary áýe kompanııasynyń basqa ushaqtarymen jetkiziletin bolady», - dedi Sergeı Hetsýrıanı.
Qazir ınjenerlik qyzmet ókilderi tehnıkalyq turǵydan aqaýdyń neden shyqqanyn tekserip jatyr.
